സംസ്ഥാനത്തെ 16 നിയമസഭാ സാമാജികരെ എം.എല്‍.എ ഹോസ്റ്റലില്‍ നിന്നും മാറ്റി സ്വകാര്യവ്യക്തിയുടെ ഫ്‌ളാറ്റില്‍ താമസിപ്പിക്കാന്‍ തീരുമാനം. പമ്പ ബ്ലോക്ക് നവീകരിക്കുന്നതിന്റെ ഭാഗമായാണ് എം.എല്‍.എമാരെ മാറ്റുന്നത്. ഇതിലൂടെ വര്‍ഷത്തില്‍ 48 ലക്ഷം രൂപ സര്‍ക്കാരിന് അധിക ചെലവുണ്ടാകും. സര്‍ക്കാരിന് ഭീമമായ സാമ്പത്തിക നഷ്ടമുണ്ടാക്കുന്ന ഈ നടപടി സി.പി.എം ബന്ധുവായ ഫ്‌ളാറ്റുടമക്ക് വേണ്ടിയാണെന്ന് എം. എല്‍.എമാര്‍ പറയുന്നു. കിള്ളിപ്പാലത്തെ അപ്പാര്‍ട്ട്‌മെന്റില്‍ ഫ്‌ളാറ്റ് അനുവദിച്ചതായി നിയമസഭാ സെക്രട്ടറി എം.എല്‍.എമാരെ അറിയിച്ചു.
നിയമസഭാ വളപ്പില്‍ തന്നെ നിരവധി കെട്ടിടങ്ങള്‍ ഒഴിഞ്ഞുകിടക്കുമ്പോഴാണ് സി.പി.എമ്മിന്റെ താല്‍പര്യ പ്രകാരം കിള്ളിപ്പാലത്തെ അപ്പാര്‍ട്ട്‌മെന്റ് വാടകക്കെടുത്തത്. ഇത്രയും എം.എല്‍.എമാരെ പാര്‍പ്പിക്കുമ്പോള്‍ അവരുടെ സുരക്ഷ ഉറപ്പുവരുത്താനുള്ള നടപടികള്‍ സ്വീകരിച്ചിട്ടില്ല. കഴിഞ്ഞ വര്‍ഷം ഏപ്രിലില്‍ ഈ അപ്പാര്‍ട്ട്‌മെന്റില്‍ കൊലപാതകം നടന്നിരുന്നു. കൈമനം ആഴാംകല്ല് കൃഷ്ണനഗറില്‍ വൈശാഖ് (34) എന്നയാളുടെ മൃതദേഹം അപ്പാര്‍ട്ട്‌മെന്റിന്റെ ബാല്‍ക്കണിയില്‍ നിന്നും കണ്ടെടുക്കുകയും തുടര്‍ന്ന് നടത്തിയ അന്വേഷണത്തില്‍ പെണ്‍വാണിഭ സംഘത്തിന്റെ കേന്ദ്രമാണിതെന്ന് പൊലീസ് സ്ഥിരീകരിക്കുകയും ചെയ്തിരുന്നു. തലസ്ഥാനത്തെ ഗുണ്ടാസംഘങ്ങളുടെ കേന്ദ്രം കൂടിയാണ് കിള്ളിപ്പാലം. പരസ്യപ്രതികരണത്തിന് മുതിരുന്നില്ലെങ്കിലും സി.പി.എം എം.എല്‍.എമാര്‍ തന്നെ ഇതില്‍ അഴിമതി ആരോപിക്കുന്നു.
ഇവിടേക്ക് മാറി താമസിക്കാന്‍ തയാറല്ലെന്ന് സി.പി.എം പാര്‍ലമെന്ററി പാര്‍ട്ടി യോഗത്തില്‍ എം.എല്‍.എമാര്‍ തന്നെ മുഖ്യമന്ത്രിയെ അറിയിച്ചെങ്കിലും തീരുമാനം മാറ്റാന്‍ സര്‍ക്കാര്‍ ഇനിയും തയാറായിട്ടില്ല. പമ്പ ബ്ലോക്കിന്റെ നിര്‍മാണം പൂര്‍ത്തീകരിക്കുന്നതുവരെ മാത്രമാണ് മാറി താമസിക്കേണ്ടി വരുന്നതെന്നും അതുവരെ എം.എല്‍.എമാര്‍ സഹകരിക്കണമെന്നുമാണ് സ്പീക്കര്‍ ഇവരോട് ആവശ്യപ്പെടുന്നത്. ഈ സര്‍ക്കാരിന്റെ കാലത്ത് പണി പൂര്‍ത്തിയാക്കാനാവില്ലെന്നും അത്രയും നാള്‍ സുരക്ഷാഭീഷണിയുള്ള അപ്പാര്‍ട്ട്‌മെന്റി ല്‍ കഴിയുക പ്രയാസമാണെന്നും എം.എല്‍.എമാര്‍ സ്പീക്കറെ അറിയിച്ചു. എന്നാല്‍ മുഖ്യമന്ത്രി ഉറച്ചുനില്‍ക്കുന്നതിനാല്‍ സ്പീക്കറുടെ ഭാഗത്തുനിന്ന് അനുകൂല നടപടിയുണ്ടാകുമെന്ന പ്രതീക്ഷ എം.എല്‍.എമാര്‍ക്കില്ല.
എം.എസ് അരുണ്‍കുമാര്‍, പി.വി ശ്രീനിജന്‍, സജീവ് ജോസഫ്, എ. രാജ, സി.ആര്‍ മഹേഷ്, പി.പി സുമോദ്, ജി. സ്റ്റീഫന്‍, സി.സി മുകുന്ദന്‍, ടി. സിദ്ധീഖ്, തോമസ് കെ തോമസ്, യു.എ ലത്തീഫ്, ഡോ. സുജിത് വിജയന്‍പിള്ള, കുറുക്കോളി മൊയ്തീന്‍, നജീബ് കാന്തപുരം, എ.കെ.എം അഷ്‌റഫ്, സനീഷ്‌കുമാര്‍ ജോസഫ് എന്നിവര്‍ക്കാണ് മാറേണ്ടിവരുന്നത്.