തിരുവനന്തപുരം: എസ്.എ.ടി ആശുപത്രിയില്‍ നിന്ന് കാണാതായ ഗര്‍ഭിണിയെ കണ്ടെത്തിയതിന് പിന്നാലെ സംഭവത്തില്‍ വന്‍ ട്വിസ്റ്റ്. യുവതി ഗര്‍ഭിണിയല്ലെന്ന് കരുനാഗപ്പള്ളിയിലെ ഡോക്ടര്‍മാരുടെ വൈദ്യ പരിശോധനയില്‍ കണ്ടെത്തി. വൈദ്യപരിശോധനയില്‍ യുവതി ഗര്‍ഭിണിയല്ലെന്ന് തെളിഞ്ഞതായി കരുനാഗപ്പള്ളി എസ്.ഐ ഉമര്‍ ഫാറൂഖ് പറഞ്ഞു.
ഭര്‍ത്താവിനൊപ്പം പ്രസവത്തിനായി എസ്.എ.ടി ആശുപത്രിയിലെത്തിയ മടവൂര്‍ സ്വദേശിനിയായ യുവതിയെ ചൊവ്വാഴ്ചയാണ് കാണാതായത്. കാണാതായി മൂന്ന് ദിവസങ്ങള്‍ക്ക് ശേഷം ഇന്ന് കരുനാഗപ്പള്ളിയിലൂടെ അലഞ്ഞു തിരിയുകയായിരുന്ന യുവതിയെ കണ്ട് സംശയിച്ച ടാക്‌സി ഡ്രൈവര്‍മാരാണ് പൊലീസിനെ വിവരമറിയിച്ചത്. തുടര്‍ന്ന് പൊലീസെത്തി യുവതിയെ കരുനാഗപ്പള്ളി ഗവണ്‍മെന്റ് ആശുപത്രിയില്‍ വൈദ്യപരിശോധനക്ക് ഹാജരാക്കുകയായിരുന്നു.
യുവതിയെ കാണാതായത് മുതല്‍ പൊലീസ് മൊബൈല്‍ ടവര്‍ കേന്ദ്രീകരിച്ചാണ് അന്വേഷണം നടത്തിയിരുന്നത്. യുവതി ചൊവ്വാഴ്ച തന്നെ ബന്ധുവിനെ വിളിച്ച് തനിക്ക് അപകടമൊന്നും പറ്റിയിട്ടില്ലെന്ന് അറിയിച്ചിരുന്നു. യുവതി ഗര്‍ഭിണിയായി അഭിനയിച്ചതും ഒളിച്ചു കടന്നതും എന്തിനായിരുന്നുവെന്ന് ഇപ്പോഴും വ്യക്തമല്ല. ഭര്‍ത്താവിന്റെ ബന്ധുക്കളും വിവരങ്ങളൊന്നും വെളിപ്പെടുത്താന്‍ തയ്യാറായിട്ടില്ല.