ന്യൂഡല്‍ഹി: തിരഞ്ഞെടുപ്പ് തന്ത്രജ്ഞന്‍ പ്രശാന്ത് കിഷോര്‍ കോണ്‍ഗ്രസില്‍ ചേര്‍ന്നേക്കുമെന്ന് സൂചന. കോണ്‍ഗ്രസ് അധ്യക്ഷ സോണിയാഗാന്ധിയുമായും രാഹുല്‍ഗാന്ധിയും കെ.സി വേണുഗോപാലുമടക്കമുള്ള നേതാക്കളുമായും പ്രശാന്ത് കിഷോര്‍ ഇന്നലെ ചര്‍ച്ച നടത്തിയിരുന്നു.
ഇതിനുശേഷമാണ് അദ്ദേഹം കോണ്‍ഗ്രസില്‍ ചേര്‍ന്നേക്കുമെന്ന സൂചന പ്രശാന്ത് കിഷോറുമായി ബന്ധപ്പെട്ട വൃത്തങ്ങള്‍ നല്‍കുന്നത്. അതേസമയം, പ്രശാന്ത് കിഷോര്‍ കോണ്‍ഗ്രസില്‍ ചേരുന്നത് സംബന്ധിച്ച് പാര്‍ട്ടി ഔദ്യോഗികമായി പ്രതികരിച്ചിട്ടില്ല. 2024 ലോക്സഭാ തിരഞ്ഞെടുപ്പ്, വിവിധ സംസ്ഥാനങ്ങളിലെ വരാനിരിക്കുന്ന നിയമസഭാ തിരഞ്ഞെടുപ്പുകള്‍ എന്നിവ സംബന്ധിച്ച് വിശദമായ പദ്ധതിരേഖ പ്രശാന്ത് കിഷോര്‍ നേതൃത്വത്തിന് മുന്നില്‍ വെച്ചിട്ടുണ്ട്.
കോണ്‍ഗ്രസിനെ ശക്തിപ്പെടുത്താന്‍ എന്തുചെയ്യാം എന്നതുസംബന്ധിച്ചും ചര്‍ച്ചനടന്നു. പ്രശാന്ത് കിഷോര്‍ മുന്നോട്ടുവെച്ച നിര്‍ദേശങ്ങള്‍ സംബന്ധിച്ച് ചര്‍ച്ചചെയ്യാനും അവ പ്രാവര്‍ത്തികമാക്കാനും ഒരു സമിതിക്ക് ഉടന്‍ രൂപംനല്‍കുമെന്ന് ചര്‍ച്ചയ്ക്കുശേഷം കോണ്‍ഗ്രസ് നേതാവ് കെ.സി. വേണുഗോപാല്‍ പറഞ്ഞു.
പ്രശാന്ത് കിഷോര്‍ സമര്‍പ്പിച്ച വിശദ പദ്ധതി രേഖ പ്രത്യേകം സമിതി ചേര്‍ന്ന് ചര്‍ച്ച ചെയ്ത ശേഷം കോണ്‍ഗ്രസ് അധ്യക്ഷയ്ക്ക് അവസാന റിപ്പോര്ട്ട് നല്‍കും. കോണ്‍ഗ്രസിനെ പൂര്‍ണമയും ഉടച്ചുവാര്‍ക്കണമെന്ന നിര്‍ദേശമാണ് പ്രശാന്ത് കിഷോര്‍ നേതൃത്വത്തിന് മുന്നില്‍ വെച്ചത്. എന്നാല്‍ അത് മുതിര്‍ന്ന നേതാക്കളെ പരിഗണിച്ചുകൊണ്ട് ആവണമെന്ന നിര്‍ദേശമാണ് ഹൈക്കമാന്‍ഡ് മുന്നോട്ടുവെച്ചത്.
കോണ്‍ഗ്രസ് പാര്‍ട്ടിയില്‍ ചേരാന്‍ താല്‍പര്യം പ്രകടിപ്പിച്ച പ്രശാന്ത് കിഷോര്‍ പാര്‍ട്ടിയുടെ പോരായ്മകള്‍ ഉള്‍പ്പെടെ ചൂണ്ടിക്കാട്ടി വിശദമായ റിപ്പോര്ട്ട് കോണ്‍ഗ്രസ് നേതൃത്വത്തിന് മുമ്പാകെ അവതരിപ്പിച്ചതായി പാര്‍ട്ടി വൃത്തങ്ങള്‍ അറിയിച്ചു. 2024ലെ ലോക്സഭാ തിരഞ്ഞെടുപ്പില്‍ 370-400 സീറ്റുകളില്‍ ശ്രദ്ധ കേന്ദ്രീകരിക്കാന്‍ പ്രശാന്ത് കിഷോര്‍ നിര്‍ദേശം മുന്നോട്ട് വെച്ചിട്ടുണ്ട്. 2024ലെ പൊതു തിരഞ്ഞെടുപ്പിന് മുമ്പ് കോണ്‍ഗ്രസിനെ പുനരുജ്ജീവിപ്പിക്കാനായി പാര്‍ട്ടിയുമായി ഈയിടെ പ്രശാന്ത് കിഷോര്‍ ചര്‍ച്ചകള്‍ തുടങ്ങിവെച്ചിരുന്നു.
നേരത്തെ നിരവധി തവണ ചര്‍ച്ചകള്‍ നടത്തിയിരുന്നെങ്കിലും ഇരു വിഭാഗവും തമ്മില്‍ ധാരണയിലെത്തിയിരുന്നില്ല.
ഗുജറാത്ത് നിയമസഭാ തിരഞ്ഞെടുപ്പിനായുള്ള തന്ത്രങ്ങളാണ് പ്രശാന്ത് കിഷോര്‍ ഒരുക്കുന്നതെന്നായിരുന്നു നേരത്തെ കോണ്‍ഗ്രസ് വ്യക്തമാക്കിയിരുന്നതെങ്കിലും കോണ്‍ഗ്രസുമായി ധാരണയിലെത്തിയാല്‍ 2024 പൊതു തിരഞ്ഞെടുപ്പ് വരെയുള്ള വിശാല കരാറായിരിക്കും ഉണ്ടാവുകയെന്നാണ് കിഷോറുമായി ബന്ധപ്പെട്ട വൃത്തങ്ങള്‍ പറയുന്നത്.