മുന്‍ മുഖ്യമന്ത്രി ഉമ്മന്‍ ചാണ്ടി അന്ത്യവിശ്രമം കൊള്ളുന്ന സെന്റ് ജോര്‍ജ് ഓര്‍ത്തഡോക്‌സ് വലിയ പള്ളിയിലെ കബറിടം സന്ദര്‍ശിച്ച് കോണ്‍ഗ്രസ് നേതാവും രാജസ്ഥാന്‍ മുന്‍ ഉപമുഖ്യമന്ത്രിയുമായ സച്ചിന്‍ പൈലറ്റ്. ഉച്ചയ്ക്ക് ഒന്നേമുക്കാലോടെ പള്ളിയില്‍ എത്തിയ സച്ചിന്‍ കുടുംബാംഗങ്ങളെ ആശ്വസിപ്പിച്ചാണു മടങ്ങിയത്. ഉമ്മന്‍ ചാണ്ടിയുടെ ഭാര്യ മറിയാമ്മയുമായും മക്കളുമായും സംസാരിച്ച സച്ചിന്‍, ഉമ്മന്‍ ചാണ്ടിയുടെ രാഷ്ട്രീയം എളിമയുടേതും സുതാര്യതയുടേതും ആയിരുന്നെന്നും പറഞ്ഞു.
”ഉമ്മന്‍ ചാണ്ടിയുടെ രാഷ്ട്രീയ മാതൃകകള്‍ എക്കാലവും പ്രസക്തമാണ്. അവ പിന്തുടരാന്‍ എല്ലാവരും ശ്രമിക്കണം. ഉമ്മന്‍ ചാണ്ടിയുടെ രാഷ്ട്രീയം എളിമയുടേതും സുതാര്യതയുടേതുമായിരുന്നു. പൊതുജീവതത്തില്‍ അദ്ദേഹം പുലര്‍ത്തിയ സത്യസന്ധത മുന്നോട്ടു കൊണ്ടുപോകാന്‍ എല്ലാവരും തയാറാകണം. എപ്പോഴും പുഞ്ചരിയോടെ മാത്രം കണ്ടിരുന്ന നേതാവ്. അദ്ദേഹത്തിന്റെ രാഷ്ട്രീയ ജീവിതം അനുകരണീയമാണ്” സച്ചിന്‍ പൈലറ്റ് മാധ്യമങ്ങളോട് പറഞ്ഞു.
കാലത്തിനുമുന്‍പേ സഞ്ചരിച്ച വ്യക്തിയും ജാതിമതഭേദമന്യേ ആളുകളെ ഒരുപോലെ കണ്ട രാഷ്ട്രീയനേതാവുമാണ്. അതുകൊണ്ടാണു വിവിധ ദേശങ്ങളില്‍ നിന്നുള്ള ആളുകള്‍ ഇവിടെ ഒഴുകിയെത്തുന്നത്. 53 കൊല്ലം ഒരേ മണ്ഡലത്തെ പ്രതിനിധീകരിക്കുമ്പോള്‍ തന്നെ അദ്ദേഹത്തിന്റെ രാഷ്ട്രീയ ശക്തിയും ബന്ധങ്ങളും മനസിലാക്കാന്‍ കഴിയും” സച്ചിന്‍ പൈലറ്റ് വിശദീകരിച്ചു.