പാനൂര്: കണ്ണൂരില്‍ വീണ്ടും സി.പി.എം-ബി.ജെ.പി സംഘര്‍ഷം അഞ്ചു പേര്‍ക്ക് വെട്ടേറ്റു. കണ്ണൂര്‍ ജില്ലയിലെ പാനൂരില്‍ ഇന്നലെ അര്‍ധരാത്രിയാണ് സംഘര്‍ഷം നടന്നത്. നാല് സി.പി.എം പ്രവര്‍ത്തകര്‍ക്കും ഒരു ബി.ജെ.പി പ്രവര്‍ത്തകനുമാണ് വെട്ടേറ്റത്.
സി.പി.എം പ്രവര്‍ത്തകരായ കണ്ണംവെള്ളിയിലെ റിജില്‍, ശ്രീരാഗ്, വിബിന്‍, ഷൈന്‍ എന്നിവര്‍ക്കാണ് വെട്ടേറ്റത്. ഇവരെ തലശേരി സഹകരണ ആശുപത്രിയിലില്‍ പ്രവേശിച്ചിരിപ്പിക്കുകയാണ്. കണ്ണംവെള്ളിയിലെ മുത്തേടത്ത് താഴെകുനിയില്‍ റോജി(19)യാണ് വെട്ടേറ്റ ബി.ജെ.പി പ്രവര്‍ത്തകന്‍. ഇയാളെ തലശേരി ഇന്ദിരാഗാന്ധി സഹകരണാശുപത്രിയിലും പ്രവേശിപ്പിച്ചു. അര്‍ധരാത്രി 12 മണിയോടെ കണ്ണംവെള്ളി കല്ലുളപുനത്തില്‍ മടപ്പുര പരിസരത്താണ് സംഭവം. മടപ്പുരയില്‍ ഉത്സവത്തിനെത്തിയവരാണ് ഇവര്‍.
സംഭവമറിഞ്ഞ് ചൊക്ലി പോലീസ് സ്ഥലത്തെത്തി. സംഘര്‍ഷം കണക്കിലെടുത്ത് കണ്ണംവെള്ളി പ്രദേശത്ത് പൊലീസ് ക്യാമ്പ് ചെയ്യുകയാണ്. ഏതാനും ദിവസങ്ങളായി പാനൂര് മേഖലയില്‍ സി.പി.എം-ബി.ജെ.പി സംഘര്‍ഷം നിലനിന്നിരുന്നു. ഇതിന്റെ തുടര്‍ച്ചയാണ് അര്‍ധരാത്രി നടന്ന അക്രമണമെന്നാണ് വിലയിരുത്തല്‍.