ഭാരത് ജോഡോ യാത്രക്കിടെ അസമില്‍ രാഹുല്‍ ഗാന്ധിയെ പൊലീസ് തടഞ്ഞു. നാഗോണ്‍ ജില്ലയിലെ ബട്ടദ്രവ സത്രം സന്ദര്‍ശിക്കാന്‍ എത്തിയപ്പോഴാണ് നടപടി. സത്രത്തിന് മുന്നില്‍ രാഹുലിനെ തടഞ്ഞ പൊലീസ് ഇവിടുത്തെ ക്ഷേത്ര ദര്‍ശനം നിഷേധിക്കുകയും ചെയ്തു.
രാഹുലിനോടൊപ്പമുണ്ടായിരുന്ന ജയറാം രമേശ് അടക്കമുള്ള കോണ്‍ഗ്രസ് നേതാക്കളെയും ഉദ്യോഗസ്ഥര്‍ തടഞ്ഞു. ക്ഷേത്ര ദര്‍ശനത്തില്‍ നിന്ന് തന്നെ തടയാന്‍ എന്ത് തെറ്റാണ് താന്‍ ചെയ്തതെന്ന് രാഹുല്‍ ഉദ്യോഗസ്ഥരോട് ചോദിച്ചു.
‘എന്താണ് സഹോദരാ പ്രശ്‌നം?, ക്ഷേത്രത്തിനുള്ളില്‍ പ്രവേശിപ്പിക്കാതിരിക്കാന്‍ താനെന്ത് തെറ്റാണ് ചെയ്തത്?’, രാഹുല്‍ ഗാന്ധി സുരക്ഷാ ഉദ്യോഗസ്ഥരോട് ചോദിച്ചു. പ്രവേശനാനുമതി നിഷേധിച്ചതിനെ തുടര്‍ന്ന് രാഹുല്‍ ഗാന്ധിയും കോണ്‍ഗ്രസ് പ്രവര്‍ത്തകരും നാഗോണിലെ റോഡില്‍ കുത്തിയിരിപ്പ് സമരം നടത്തി.