വാഹനാപകടത്തില്‍ മരണപ്പെട്ട പഞ്ചാബി നടന്‍ ദീപ് സിദ്ദുവിന്റെ കാറില്‍ നിന്ന് മദ്യക്കുപ്പികള്‍ കണ്ടെത്തിയതായി പൊലീസ് അറിയിച്ചു. സിദ്ദുവിന്റെ കാറുമായി കൂട്ടിയിടിച്ച ട്രക്ക് ഡ്രൈവര്‍ക്കെതിരെ പൊലീസ് കേസെടുത്തിട്ടുണ്ട്. അശ്രദ്ധയോടെ വാഹനമോടിച്ചതിനാണ് കേസെടുത്തത്. ഇയാളെ പിടികൂടാനുള്ള ശ്രമം നടക്കുകയാണെന്ന് പൊലീസ് പറഞ്ഞു. ചൊവ്വാഴ്ച വൈകീട്ട് ഹരിയാനയിലെ സോനപറ്റില്‍ വച്ചാണ് വാഹനാപകടം നടന്നത്. ഇദ്ദേഹം സഞ്ചരിച്ച കാര്‍ ട്രക്കില്‍ ഇടിക്കുകയായിരുന്നു. ഡല്‍ഹിയില്‍ നിന്ന് ഭട്ടിന്‍ഡയിലേക്ക് പോകുന്നതിനിടെയാണ് സംഭവം നടന്നത്. കാറിലുണ്ടായിരുന്ന സുഹൃത്തിനും പരിക്കേറ്റിരുന്നു.
സിദ്ദുവിന്റെ ആന്തരികാവയവങ്ങളുടെ സാമ്പിള്‍ ശേഖരിച്ചിരുന്നു. എഫ്എസ്എല്‍ റിപ്പോര്‍ട്ട് പരിശോധിച്ച ശേഷം തുടര്‍നടപടിയുമായി മുന്നോട്ട് പോകുമെന്ന് പൊലീസ് അറിയിച്ചു. പോസ്റ്റ്‌മോര്‍ട്ടത്തിന് ശേഷം സിദ്ദുവിന്റെ മൃതദേഹം കുടുംബത്തിന് വിട്ടുകൊടുത്തു.
നടനും സാമൂഹിക പ്രവര്‍ത്തകനുമായ ദീപ് സിദ്ദുവിനെതിരെ 2021ല്‍ ചെങ്കോട്ടയിലുണ്ടായ പ്രക്ഷോഭത്തില്‍ ആരോപണം ഉയര്‍ന്നിരുന്നു. കഴിഞ്ഞ വര്‍ഷം ഫെബ്രുവരി ഒമ്പതിന് സംഭവത്തില്‍ ഇദ്ദേഹം അറസ്റ്റിലായിരുന്നു. കര്‍ഷകര്‍ ചെങ്കോട്ടയില്‍ വെച്ച് നടത്തിയ പ്രതിഷേധം അക്രമത്തിലായിരുന്നു കലാശിച്ചിരുന്നത്.