തിരുവനന്തപുരം: അനിശ്ചിതത്വങ്ങള്‍ക്കിടെ ഒന്നാംവര്‍ഷ ഹയര്‍സെക്കന്‍ഡറി പ്രവേശന സമയക്രമം പുതുക്കി സര്‍ക്കാര്‍ തീരുമാനം. ട്രയല്‍ അലോട്ട്‌മെന്റ് വ്യാഴാഴ്ച പ്രസിദ്ധീകരിക്കും. ആഗസ്റ്റ് മൂന്നിന് ആദ്യ പ്രവേശന പട്ടിക പ്രസിദ്ധകരിക്കും. 20ന് മുഖ്യഅലോട്ട്‌മെന്റ് പൂര്‍ത്തിയാകും. 22ന് ക്ലാസ് ആരംഭിക്കും. 23 മുതല്‍ 30 വരെ സപ്ലിമെന്ററി പ്രവേശനം. സ്‌പോര്‍ട്‌സ് ക്വോട്ട ഒന്നാം അലോട്ട്‌മെന്റ് ആഗസ്റ്റ് മൂന്നിനും അവസാന അലോട്ട്‌മെന്റ് 17നും നടക്കും.
കമ്യൂണിറ്റി ക്വോട്ടയില്‍ ആഗസ്റ്റ് ആറോടെ ഡാറ്റ എന്‍ട്രി പൂര്‍ത്തിയാക്കി ഒമ്പതോടെ റാങ്ക് പട്ടിക പ്രസിദ്ധീകരിച്ച് പ്രവേശനം ആരംഭിക്കും. മാനേജ്‌മെന്റ്, അണ്‍ എയ്ഡഡ് പ്രവേശനം ആഗസ്റ്റ് ആറുമുതല്‍ 20 വരെയാണ്. 11ന് ആരംഭിച്ച അപേക്ഷാ സമര്‍പ്പണം സി.ബി.എസ.്ഇ വിദ്യാര്‍ഥികള്‍ക്കായി നീട്ടി നല്‍കിയതോടെയാണ് സമയം പുനക്രമീകരിച്ചത്. സി.ബി.എസ്.ഇ 10-ാം ക്ലാസ് ഫലം പ്രസിദ്ധീകരിക്കാത്ത സാഹചര്യത്തില്‍ വിദ്യാര്‍ഥികള്‍ നല്‍കിയ ഹര്‍ജിയെ തുടര്‍ന്ന് കോടതി സമയം നീട്ടിനല്‍കിയിരുന്നു.