നടിയെ ആക്രമിച്ച കേസ്: അതിജീവിതയെ അപമാനിച്ച് വീണ്ടും പി.സി ജോര്‍ജ്ജ്
കോട്ടയം: നടിയെ ആക്രമിച്ച കേസിലെ അതിജീവിതയെ അപമാനിച്ച് വീണ്ടും പി.സി ജോര്‍ജ്ജ്. കേസ് വന്നതിനാല്‍ അതിജീവിതക്ക് നിരവധി സിനിമകളില്‍ അവസരം ലഭിച്ചുവെന്ന് പി.സി ജോര്‍ജ്ജ് ആരോപിച്ചു. കോട്ടയത്ത് വാര്‍ത്താസമ്മേളനത്തില്‍ സംസാരിക്കവെയായിരുന്നു പി.സി ജോര്‍ജ്ജിന്റെ വിവാദ പരാമര്‍ശം.
നടന്‍ ദിലീപിനെതിരെ കേസ് വന്നതു കൊണ്ടാണ് അതിജീവിത സിനിമാമേഖലയില്‍ കുറേ കൂടി തിളങ്ങാന്‍ തുടങ്ങിയത്. വ്യക്തിജീവിതത്തില്‍ നഷ്ടം ഉണ്ടായിട്ടുണ്ടാവുമെങ്കിലും കേസ് വന്നതു കൊണ്ട് പൊതുമേഖലയില്‍ അതിജീവിതക്ക് ലാഭം മാത്രമാണ് ഉണ്ടായതെന്നും പി.സി ആരോപിച്ചു. അദ്ദേഹത്തിന്റെ വാക്കുകള്‍ ഇങ്ങനെ:
‘ ആ കേസില്‍ വിധി വരാറായപ്പോള്‍ അടുത്ത കേസ് വന്നില്ലേ? അടുത്ത തെളിവെടുപ്പ് നടക്കുകയല്ലേ. അത് കൊണ്ട് ഒരു ഗുണം കിട്ടി. അവര്‍ക്ക് പറയുന്ന പേരെന്താ, അതിജീവിതയോ? ഉപജീവിതയോ? ആ അതിജീവിത. അവര്‍ക്ക് ഒത്തിരി സിനിമ കിട്ടുന്നുണ്ട്. പിന്നെന്താ? അവര്‍ രക്ഷപ്പെട്ടു. അതല്ലേ നമുക്ക് ആവശ്യം? ഒരു പ്രശ്‌നവുമില്ലെന്നേ. അതില്‍ കൂടുതല്‍ പറയാന്‍ പാടുണ്ടോ? , പി.സി ജോര്‍ജ്ജ് പറഞ്ഞു.