ടോക്യോ: പാരാലിമ്പിക്‌സില്‍ ഇന്ത്യക്ക് വീണ്ടും മെഡല്‍. നേരത്തെ സ്വര്‍ണം നേടിയ അവനി ലേഖറയാണ് ഒരു വെങ്കല മെഡല്‍ കൂടി നേടി രാജ്യത്തിനായി ഇരട്ട നേട്ടം കൊയ്തത്. വനിതകളുടെ 50 മീറ്റര്‍ റൈഫിള്‍ ത്രീ എസ്എച്ച് വിഭാഗത്തിലാണ് അവനി ലേഖറക്ക വെങ്കലം. നേരത്തെ വനിതകളുടെ 10 മീറ്റര്‍ എയര്‍ റൈഫിളില്‍ അവനി സ്വര്‍ണം നേടിയിരുന്നു. ഇതോടെ പാരാലിമ്പിക്‌സില്‍ രണ്ട് മെഡലുകള്‍ നേടുന്ന ആദ്യ ഇന്ത്യന്‍ വനിതാ താരമായി അവനി മാറി.
19 വയസാണ് അവനിയുടെ പ്രായം. 445.9 പോയിന്റ് നേടിയാണ് അവനി വെങ്കലം കരസ്ഥമാക്കിയത്. ചൈനയുടെ സിപി ഷാങ്ങിനാണ് സ്വര്‍ണം. ജര്‍മനിയുടെ ഹില്‍ട്രോപ്പിന് വെള്ളിയും.
ഇതോടെ പാരാലിമ്പിക്സിലെ ഇന്ത്യയുടെ മെഡല്‍ നേട്ടം 12 ആയി. രണ്ട് സ്വര്‍ണം, ആറ് വെള്ളി, നാല് വെങ്കലം. പോയിന്റ് പട്ടികയില്‍ ഇന്ത്യ 36ാം സ്ഥാനത്ത് തുടരുന്നു.