മലപ്പുറം: പാണക്കാട് പി.എം.എസ്.എ പൂക്കോയ തങ്ങളുടെ സ്മരണാര്‍ത്ഥം മുസ്‌ലിംലീഗ് സംസ്ഥാന കമ്മിറ്റിയുടെയും സി.എച്ച് സെന്ററിന്റെയും നേതൃത്വത്തില്‍ കിടപ്പിലായ രോഗികളെ പരിചരിക്കാന്‍ 24 മണിക്കൂറും പ്രവര്‍ത്തിക്കുന്ന പാലിയേറ്റിവ് കെയര്‍ സേവനങ്ങള്‍ക്ക് തുടക്കമായി. മലപ്പുറത്ത് നടന്ന ചടങ്ങില്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഓണ്‍ലൈന്‍ വഴി ഉദ്ഘാടനവും ഫഌഗ് ഓഫും നിര്‍വഹിച്ച് പദ്ധതി നാടിനു സമര്‍പ്പിച്ചു. രാത്രികാലങ്ങളിലും ഡോക്ടറുടെ സേവനങ്ങളടക്കം ലഭ്യമാകുന്ന പാലിയേറ്റീവ് കെയര്‍ സംവിധാനം ഏഷ്യയില്‍ത്തന്നെ ഇതാദ്യമാണ്. കോഴിക്കോട്, മലപ്പുറം ജില്ലകളിലാണ് പ്രാരംഭഘട്ടത്തില്‍ പദ്ധതി പ്രവര്‍ത്തിക്കുക.
കോവിഡ് കാലത്ത് കിടപ്പു രോഗികള്‍ക്ക് ഈ സേവനം വലിയ അനുഗ്രഹമാകും. രോഗിക്ക് രാത്രിയില്‍ പ്രയാസമുണ്ടായാല്‍ വളണ്ടിയറെ വിളിച്ച് വിവരം പറഞ്ഞാല്‍ സഹായമെത്തും. ഇവര്‍ക്ക് സാധ്യമാകാത്ത ചികിത്സയാണെങ്കില്‍ വാഹനത്തില്‍ സൗജന്യമായി ആശുപത്രിയിലെത്തിക്കും. ഓരോ നാട്ടിലും ഒരു കുടുംബ ഡോക്ടര്‍ എന്ന ആശയമാണ് ഇതിലൂടെ പ്രാവര്‍ത്തികമാകുന്നത്. ഒരു ലക്ഷത്തി നാല്‍പതിനായിരം വളണ്ടിയര്‍മാരാണ് സേവന രംഗത്തേക്കിറങ്ങുന്നത്.
പത്മശ്രീ ഡോ: എം.ആര്‍. രാജഗോപാല്‍, ഡോ: കെ. സുരേഷ് കുമാര്‍, ഡയറക്ടര്‍ ഐ.പി.എം, കോഴിക്കോട് എന്നിവര്‍ മുഖ്യാതിഥികളായ ചടങ്ങില്‍ പി.കെ കുഞ്ഞാലിക്കുട്ടി എം.പി, ഇ.ടി മുഹമ്മദ് ബഷീര്‍ എം.പി, കെ.പി.എ മജീദ്, സയ്യിദ് സാദിഖലി ശിഹാബ് തങ്ങള്‍, പി.വി അബ്ദുല്‍ വഹാബ് എം.പി, ഡോ. എം.കെ മുനീര്‍, സയ്യിദ് മുനവ്വറലി ശിഹാബ് തങ്ങള്‍, എം.എ. റസാഖ് മാസ്റ്റര്‍, കെ.പി കോയ തുടങ്ങിയവരും ഡോ: അഷ്‌റഫ് ടി.പി, ഡോ: ഇദ്രീസ് വി, ഡോ: അമീര്‍ അലി എന്നീ ആരോഗ്യ വിദഗ്ദ്ധരും സംസാരിച്ചു.