അരിക്കൊമ്പന് പിന്നാലെ അരി തേടിയെത്തുന്ന ആനയായി കാട്ടാന പടയപ്പയും. ഇന്നലെ അര്‍ധരാത്രി മറയൂര്‍ പാമ്പന്‍ മലയിലെ ലയത്തില്‍ നിന്ന് ഒരു ചാക്ക് അരിയാണ് പടയപ്പ തിന്നത്. പ്രദേശത്ത് ഭീകരാന്തരീക്ഷം സൃഷ്ടിച്ച പടയപ്പ രണ്ടു വീടുകള്‍ ഭാഗികമായി തകര്‍ത്തു. പാമ്പന്‍ മല സ്വദേശികളായ കറുപ്പസാമി, രാജേന്ദ്രന്‍ എന്നിവരുടെ വീടുകളാണ് തകര്‍ത്തത്. പടക്കം പൊട്ടിച്ചും ശബ്ദമുണ്ടാക്കിയുമാണ് ആനയെ നാട്ടുകാര്‍ ഓടിച്ചത്.
പതിനാറു കുടുംബങ്ങളാണ് പാമ്പന്‍ മലയിലെ ലയത്തില്‍ താമസിക്കുന്നത്. ലയത്തിനകത്ത് സൂക്ഷിച്ചിരുന്ന ഒരു ചാക്ക് അരി പുറത്തേക്ക് വലിച്ചിട്ട് മുഴുവന്‍ തിന്നുതീര്‍ക്കുകയും ചെയ്തു. ആദ്യമായാണ് പടയപ്പ അരി തിന്നുന്നതെന്നാണ് പ്രദേശവാസികള്‍ പറയുന്നത്. നേരത്തെ ആരെയും ഉപദ്രവകാരിയല്ലാത്ത ആനയായിരുന്നു പടയപ്പ. ഈ അടുത്താണ് ആന ഇത്രയും അക്രമാസക്തമായി പെരുമാറാന്‍ തുടങ്ങിയത്.