കൊളംബോ: ഏകദിന ലോകകപ്പിനൊരുങ്ങുന്ന ബംഗ്ലാദേശ് ടീമിലെ താരങ്ങള്‍ക്ക് മതിയായ വിശ്രമം വേണമെന്ന് നായകന്‍ ഷാക്കിബ് അല്‍ ഹസന്‍. ഏഷ്യാ കപ്പിന് ശേഷം നടക്കുന്ന ന്യുസിലന്‍ഡിനെതിരായ പരമ്പരയെക്കുറിച്ച് സംസാരിക്കുകയായിരുന്നു അദ്ദേഹം. ഈ മാസം 21 മുതല്‍ 26 വരെ ധാക്കയിലാണ് കീവിസിനെതിരായ ഏകദിന പരമ്പര. ഈ പരമ്പരയില്‍ നിന്ന് ലോകകപ്പ് താരങ്ങളെ മാറ്രി നിര്‍ത്തണമെന്ന് ഷാക്കിബ് വാദിക്കുന്നത് ഏഷ്യാ കപ്പ് വേളയിലാണ്. 26 നാണ് ബംഗ്ലാദേശും ന്യുസിലന്‍ഡും തമ്മിലുള്ള പരമ്പര അവസാനിക്കുന്നത്.
അടുത്ത ദിവസം തന്നെ രണ്ട് ടീമുകളും ഇന്ത്യയിലേക്ക് തിരിക്കണം. ലോകകപ്പ് വേളയില്‍ ഇന്ത്യയില്‍ ധാരാളം യാത്ര നടത്താനുണ്ട്. വലിയ ചാമ്പ്യന്‍ഷിപ്പാണ്. അത് മുന്‍നിര്‍ത്തിയാണ് വിശ്രമം തേടുന്നതെന്നും ഷാക്കിബ് പറഞ്ഞു. കിവീസിനെതിരായ പരമ്പര പ്രധാനമാണ്. ആ പരമ്പരയിലേക്ക് കൂടുതല്‍ താരങ്ങള്‍ക്ക് അവസരം നല്‍കണം. ലോകകപ്പ് ബെര്‍ത്ത് ഉറപ്പാക്കിയ താരങ്ങള്‍ക്ക് വിശ്രമം നിര്‍ബന്ധമാണ്. ലോകകപ്പിലേക്ക് പോവുമ്പോള്‍ പരുക്ക് പാടില്ല. നല്ല ആരോഗ്യം വേണം. ഇന്ത്യയിലെ യാത്ര മറക്കരുത്-നായകന്‍ പറഞ്ഞു.