കോഴിക്കോട്: ഒന്നാം സെമസ്റ്റര്‍ പി.ജി മൂല്യനിര്‍ണയ ക്യാംപുകളില്‍ പങ്കെടുക്കാത്തതിന് കാലിക്കറ്റ് സര്‍വകലാശാലയിലെ കോളേജുകളിലെ നൂറിലേറെ അധ്യാപകര്‍ക്ക് നോട്ടീസ്. നിയമനോത്തരവ് നല്‍കിയിട്ടും ക്യാപില്‍ ഹാജരാകാത്തതിന് കാരണം കാണിക്കണമെന്നാണ് നിര്‍ദേശം.
ഏപ്രില്‍, മെയ് മാസങ്ങളില്‍ നടത്തിയ ക്യാപുകളില്‍ പങ്കെടുക്കാത്തവര്‍ക്കാണു നോട്ടീസ് നല്‍കിയത്. അതേസമയം, അക്കാദമിക് കാരണങ്ങളാല്‍ ക്യാപില്‍ പങ്കെടുക്കാത്ത അധ്യാപകരോടും യൂണിവേഴ്‌സിറ്റി വിശദീകരണം തേടിയിട്ടുണ്ടെന്നും അധ്യാപകരെ അപമാനിക്കുന്ന ഇത്തരം നടപടികള്‍ക്കെതിരെ പ്രതിഷേധ പരിപാടികള്‍ക്കു രൂപം നല്‍കുമെന്നും സെനറ്റ് അംഗം ഡോ. എ.ടി. അബ്ദുല്‍ ജബ്ബാര്‍ പറഞ്ഞു. മതിയായ കാരണം ബോധിപ്പിക്കുന്നവരെ നടപടിയില്‍നിന്ന് ഒഴിവാക്കുമെന്ന് കണ്‍ട്രോളര്‍ ഡോ. ഡി.പി.ഗോഡ്‌വിന്‍ സാംരാജ് അറിയിച്ചു.