ന്യൂഡല്‍ഹി: നോട്ട് നിരോധനത്തിന് ശേഷം ആറ് വര്‍ഷം പിന്നിട്ടിട്ടും ജനങ്ങളുടെ കൈവശമുള്ള കറന്‍സി നോട്ടുകള്‍ വര്‍ധിച്ചതായി റിസര്‍വ് ബാങ്ക് ഓഫ് ഇന്ത്യയുടെ റിപ്പോര്‍ട്ട്. 2022 ഒക്ടോബര്‍ വരെയുള്ള കണക്ക് അനുസരിച്ച് ജനങ്ങളുടെ കൈയ്യില്‍ 30.88 ലക്ഷം കോടി രൂപയോളം കറന്‍സി നോട്ടുകളുണ്ട്.
2016 നവംബര്‍ എട്ടിന് നോട്ട് നിരോധിക്കുന്ന രാജ്യത്തെ പൗരന്മാരുടെ കൈയ്യിലുള്ളതിനേക്കാള്‍ 71.84% ശതമാനം കൂടുതലാണ് ഇപ്പോഴുള്ളതെന്ന് ആര്‍.ബി.ഐയുടെ കണക്കുകള്‍ വ്യക്തമാക്കുന്നു. 2016 നവംബര്‍ 4 ന് ജനങ്ങളുടെ കൈവശമുള്ള പണത്തിന്റെ അളവ് 17.7 ലക്ഷം കോടി രൂപയായിരുന്നു. പണ ഉപഭോഗം കുറച്ച് ഡിജിറ്റല്‍ പണമിടപാട് വര്‍ദ്ധിപ്പിക്കുക എന്ന ലക്ഷ്യം പരാജയപ്പെട്ടെന്ന് പുതിയ കണക്കുകള്‍ സൂചിപ്പിക്കുന്നു. പ്രധാനമന്ത്രി നരേന്ദ്ര മോദി 2016 നവംബര്‍ 8 ന് അര്‍ധരാത്രിയാണ് രാജ്യത്ത് നോട്ട് നിരോധനം പ്രഖ്യാപിച്ചത്. 500, 1000 രൂപാ നോട്ടുകള്‍ പിന്‍വലിക്കുകയായിരുന്നു അന്ന്. രാജ്യത്തെ കള്ളപ്പണം ഇല്ലാതാക്കുകയും വിപണിയില്‍ പണത്തിന്റെ ഉപയോഗം കുറയ്ക്കുകയും ചെയ്യുക എന്നുള്ളതായിരുന്നു നോട്ട് നിരോധനത്തിന് പിന്നാലെയുള്ള വിശദീകരണം. മാത്രമല്ല, രാജ്യത്ത് ഡിജിറ്റല്‍ ഇടപാട് വര്‍ധിപ്പിക്കുക എന്നതും ഈ നീക്കത്തിന്റെ ലക്ഷ്യമായി മോദി അവകാശപ്പെട്ടു.
ചരക്കുകളും സേവനങ്ങളും വാങ്ങാന്‍ ജനം ഉപയോഗിക്കുന്ന പണത്തെയാണ് പൊതുജനങ്ങളുടെ കൈയിലുള്ള കറന്‍സിയായി സൂചിപ്പിക്കുന്നത്. പ്രചാരത്തിലുള്ള മൊത്തം കറന്‍സിയില്‍ നിന്ന് ബാങ്കുകളിലെ പണത്തിന്റെ അളവ് കുറച്ചാണ് ഇത് കണക്കാക്കുക.ദൈനംദിന ആവശ്യങ്ങള്‍ക്ക് പണത്തെ ആശ്രയിക്കുന്ന സാധാരണ പൗരന്മാര്‍ക്ക് നോട്ട് നിരോധനം വലിയ ദുരിതമാണ് വരുത്തിയത്. നോട്ട് നിരോധിച്ചപ്പോള്‍ സര്‍ക്കാര്‍ നിരത്തിയ ലക്ഷ്യങ്ങളൊന്നും നേടാനായില്ലെന്നും പ്രധാനമന്ത്രിയുടെ അര്‍ധരാത്രിയിലെ നടപടി പൂര്‍ണ പരാജയമായിരുന്നെന്നും പിന്നീട് വ്യക്തമായി. നിരോധിച്ച നോട്ടിന്റെ 99.3 ശതമാനവും ബാങ്കുകളില്‍ തിരിച്ചെത്തിയതോടെ രാജ്യത്ത് വിനിമയത്തിലിരുന്ന പണത്തിന്റെ 30 ശതമാനവും കള്ളപ്പണമാണെന്ന വാദവും പൊളിഞ്ഞു.