ഒരുപാട് പുരസ്കാരങ്ങൾ ആടുജീവിതത്തിനെ തേടിയെത്തിയതിൽ വലിയ സന്തോഷമെന്ന് നടൻ പൃഥ്വിരാജ്. തൻ്റെ നേട്ടത്തെക്കാൾ സന്തോഷം ബ്ലെസിയുടെ അധ്വാനത്തിന് വലിയ അംഗീകാരം ലഭിച്ചതിലാണെന്നും പൃഥ്വിരാജ് പറഞ്ഞു. മികച്ച നടനുള്ള സംസ്ഥാന പുരസ്കാരം ലഭിച്ചതിന് പിന്നാലെ പ്രതികരിക്കുകയായിരുന്നു അദ്ദേഹം.
‘ഒരുപാട് സന്തോഷമുണ്ട്, മികച്ച നടനുള്ള അംഗീകാരം എനിക്ക് ലഭിച്ചു എന്നുള്ളതിനൊപ്പം തന്നെ ആ സിനിമയ്ക്ക് ഇത്രയും അംഗീകാരം കിട്ടിയതിൽ സന്തോഷമുണ്ട്. ഈ അംഗീകാരങ്ങൾക്ക് ഒപ്പം തന്നെ ആ സിനിമയ്ക്ക് ലഭിക്കാവുന്നതിൽ ഏറ്റവും വലിയ അംഗീകാരം സിനിമ റിലീസ് ചെയ്തപ്പോൾ ലോകമെമ്പാടുമുള്ള പ്രേക്ഷകർ ആ സിനിമക്ക് അംഗീകാരം തന്നു എന്നുള്ളതാണ്, അത് കഴിഞ്ഞതിനുശേഷം ആണ് ഈ അംഗീകാരം കിട്ടുന്നത് എന്നത് സന്തോഷത്തിന് ആക്കം കൂട്ടുന്നു. എന്റെ കരിയറിൽ ഏറ്റവും കൂടുതൽ വെല്ലുവിളികൾ നിറഞ്ഞ സിനിമയും കഥാപാത്രവും ആയിരുന്നു ഇത്.
വലിയ സ്വപ്‌നങ്ങള്‍ കാണുന്ന ഒരുകൂട്ടം ആള്‍ക്കാരില്‍ പെട്ടതാണ് ഞാനും. ഒരു ലാന്റ്മാര്‍ക് വര്‍ഷം ആണ് മലയാളസിനിമക്ക് കഴിഞ്ഞുപോയത്. മലയാള സിനിമയുടെ പ്രയാണം ഇനിയും ഉയരങ്ങളില്‍ എത്തട്ടെ. മലയാള സിനിമയെക്കുറിച്ച് സംസാരിക്കുമ്പോൾ ഭയങ്കരമായ അഭിമാനം അനുഭവിക്കുന്ന ആളാണ് ഞാന്‍.