തൃശൂര്‍: തൃശൂരിലെ നിധിന്‍ വധക്കേസില്‍ ഒരു പ്രതി കൂടി അറസ്റ്റിലായി. ചേര്‍പ്പ് ഊരകം സ്വദേശി കരിപ്പാംകുളം വീട്ടില്‍ നിഷാദിനെയാണ് (28) അന്വേഷണ സംഘം ഊരകത്ത് നിന്ന് പിടികൂടിയത്. ഇതോടെ നിധിന്‍ വധക്കേസില്‍ അറസ്റ്റിലാകുന്നവരുടെ എണ്ണം ഒമ്പതായി.നിധിനെ കൊലപ്പെടുത്തിയവര്‍ക്ക് ഒളിവില്‍ താമസിക്കാന്‍ സൗകര്യം ഒരുക്കിക്കൊടുത്തയാളാണ് നിഷാദ്.
നേരത്തെ സനല്‍, ശ്രീരാഗ്, അനുരാഗ്, സായിഷ്, അഖില്‍, സന്ദീപ്, ധനേഷ് പ്രിജിത്ത് എന്നിവരെ അറസ്റ്റ് ചെയ്തിരുന്നു. കഴിഞ്ഞ 10നാണ് മാങ്ങാട്ടുകരയില്‍വച്ച് കാറിലെത്തിയ സംഘം നിധിന്‍ ഓടിച്ചിരുന്ന കാര്‍ തടഞ്ഞ് നിധിനെ വലിച്ചിറക്കി വെട്ടിക്കൊന്നത്. നേരിട്ട് പങ്കെടുത്തവരെ ചോദ്യം ചെയ്തപ്പോഴാണ് പ്രതികള്‍ക്ക് ഒളി താവളമൊരുക്കിയത് സന്ദീപും നിഷാദും ആണെന്ന് പോലീസിന് വിവരം ലഭിച്ചത്.
ഇതില്‍ വല്ലച്ചിറ സ്വദേശിയായ സന്ദീപിനെ ഏതാനും ദിവസം മുമ്പ് അറസ്റ്റ് ചെയ്തിരുന്നു. ഇപ്പോഴാണ് അന്വേഷണത്തിലൂടെ നിഷാദിനേയും പിടികൂടാന്‍ കഴിഞ്ഞതെന്ന് പോലീസ് പറഞ്ഞു. സംഭവത്തിന് ശേഷം പ്രതികള്‍ എറണാകുളം, ആലപ്പുഴ, മണ്ണുത്തി മേഖലയിലാണ് ഒളിവില്‍ കഴിഞ്ഞത്. കൂടുതല്‍ പ്രതികള്‍ ഉണ്ടാകുമെന്ന തിരിച്ചറിവില്‍ മുഴുവന്‍ പ്രതികളേയും പിടികൂടാന്‍ പോലീസ് അന്വേഷണം ഊര്‍ജിതമാണെന്ന് പോലീസ് പറഞ്ഞു.