സാവോപോളോ: കോപ്പ അമേരിക്ക ഫൈനലില്‍ എതിരാളികളായി ചിരവൈരികളായ അര്‍ജന്റീനയെ ലഭിക്കണമെന്നാണ് ആഗ്രഹമെന്ന് ബ്രസീല്‍ സൂപ്പര്‍ താരം നെയ്മര്‍. പെറുവിനെതിരായ സെമിഫൈനല്‍ മത്സരത്തിനു ശേഷം സംസാരിക്കവേയാണ് നെയ്മര്‍ അര്‍ജന്റീനയ്ക്ക് പിന്തുണ നല്‍കിയത്. ”ഫൈനലില്‍ അര്‍ജന്റീനയെ എതിരാളികളായി ലഭിക്കണമെന്നാണ് ആഗ്രഹം. അര്‍ജന്റീന ടീമില്‍ എനിക്ക് ഒട്ടേറെ സുഹൃത്തുക്കളുണ്ട്. അതുകൊണ്ടാണ് അവരെ പിന്തുണയ്ക്കുന്നത്. ഫൈനലില്‍ ഞങ്ങള്‍ തന്നെ ജയിക്കും. നെയ്മര്‍ പറഞ്ഞു.
പെറുവിനെതിരെ നടന്ന സെമിഫൈനല്‍ മത്സരത്തില്‍ ഏകപക്ഷീയമായ ഒരു ഗോളിനാണ് ബ്രസീലിന്റെ വിജയം. ഇതോടെ നിലവിലെ ചാമ്പ്യന്മാര്‍ ഫൈനല്‍ ടിക്കറ്റുറപ്പിച്ചു. 35ആം മിനിട്ടില്‍ ലൂകാസ് പക്വേറ്റയാണ് വിജയഗോള്‍ നേടിയത്. ബ്രസീലിന്റെ തുടരന്‍ ആക്രമണങ്ങളോടെയാണ് കളി ആരംഭിച്ചത്. നിര്‍ഭാഗ്യവും ക്രോസ് ബാറിനു കീഴില്‍ പെറു ഗോളി പെഡ്രോ ഗല്ലീസിന്റെ അസാമാന്യ പ്രകടനവും കൂടിച്ചേര്‍ന്നപ്പോള്‍ ബ്രസീലിന് കാര്യങ്ങള്‍ കടുപ്പമാവുകയായിരുന്നു.