കട്ടപ്പനയില്‍ സംഘര്‍ഷത്തിനിടെ ഒരാള്‍ കൊല്ലപ്പെട്ടു. നിര്‍മ്മല സിറ്റി സ്വദേശി രാജു (47) ആണ് മരിച്ചത്.സംഭവത്തില്‍ കൗന്തി സ്വദേശി ഹരിമുകാര്‍, വാഴര സ്വദേശി ജോബി എന്നിവരെ പിടികൂടി.രാജുവിന്റെ മകന്‍ രാഹുലിന്റെ സുഹൃത്തുക്കളാണ് ഹരികുമാറും, ജോബിയും. അടുത്തിടെ ഹരികുമാറിന്റെ ബൈക്ക് ഒരു യാത്രയ്ക്കായി രാഹുല്‍ വാങ്ങിയിരുന്നു. എന്നാല്‍ യാത്രയ്ക്കിടെ ബൈക്ക് അപകടത്തില്‍പ്പെട്ടു.
തുടര്‍ന്ന് ബൈക്ക് അറ്റകുറ്റപ്പണി നടത്തിയ ശേഷം തിരികെ നല്‍കാമെന്ന് രാഹുലും രാജുവും ഉറപ്പ് നല്‍കിയിരുന്നു. എന്നാല്‍ അറ്റകുറ്റപ്പണി വൈകിയതോടെ ഇന്നലെ രാത്രി ഹരികുമാറും ജോബിയും രാഹുലിന്റെ വീട്ടിലെത്തി പ്രശ്നമുണ്ടാക്കുകയായിരുന്നു.രാഹുലിനെ പ്രതികള്‍ ചേര്‍ന്ന് മര്‍ദ്ദിക്കാന്‍ ശ്രമിച്ചപ്പോള്‍ രാജു തടഞ്ഞു. ഇതിനിടെ രാജുവിന് അടിയേല്‍ക്കുകയായിരുന്നു. അടിയേറ്റ് ബോധരഹിതനായി വീണ രാജുവിനെ നാട്ടുകാരാണ് ആശുപത്രിയില്‍ എത്തിച്ചത്. എന്നാല്‍ അപ്പോഴേക്കും മരിക്കുകയായിരുന്നു.
പ്രതികളെ ഇന്നലെ രാത്രി തന്നെ പോലീസ് പിടികൂടിയിരുന്നു.സംഘര്‍ഷത്തില്‍ ഹരികുമാറിനും പരിക്കേറ്റിരുന്നു. ഇയാള്‍ ഇടുക്കി മെഡിക്കല്‍ കോളേജ് ആശുപത്രിയില്‍ ചികിത്സയിലാണ്.