യുവന്റസ് വിട്ട് മറ്റു ക്ലബ്ബിലേക്ക് ചേക്കേറും എന്ന വാര്‍ത്തകളും റിപ്പോര്‍ട്ടുകളും നിഷേധിച്ച് സൂപ്പര്‍ താരം ക്രിസ്റ്റ്യാനോ റൊണാള്‍ഡോ. തന്റെ പേര് ചേര്‍ത്ത് പല ഊഹാപോഹങ്ങളും വ്യാജവാര്‍ത്തകളും പല രീതിയിലും പ്രചരിക്കുന്നുണ്ട്. എന്നാല്‍ ഇതിലൊന്നും അടിസ്ഥാനമില്ലെന്നും തനിക്ക് പ്രധാനം കാരിയര്‍ ആണെന്നും സൂപ്പര്‍ താരം ക്രിസ്റ്റ്യാനോ റൊണാള്‍ഡോ. തന്റെ സാമൂഹ്യ മാധ്യമങ്ങള്‍ വഴിയാണ് താരം നിലപാട് വ്യക്തമാക്കിയത്.
എന്നെ അറിയാവുന്ന ഏതൊരാള്‍ക്കും എന്റെ ജോലിയില്‍ ഞാന്‍ എത്രമാത്രം ശ്രദ്ധ കേന്ദ്രീകരിച്ചിട്ടുണ്ടെന്ന് അറിയാം. കുറച്ച് സംസാരവും കൂടുതല്‍ പ്രവര്‍ത്തനവും, എന്റെ കരിയറിന്റെ തുടക്കം മുതല്‍ ഇത് എന്റെ വഴികാട്ടിയാണ്. എന്നിരുന്നാലും, അടുത്തിടെ പറഞ്ഞതും എഴുതിയതുമായ എല്ലാ കാര്യങ്ങളും കണക്കിലെടുക്കുമ്പോള്‍, ഞാന്‍ എന്റെ നിലപാട് വ്യക്തമാക്കേണ്ടതുണ്ട്. എന്നിങ്ങനെ തുടങ്ങിയാണ് താരം തന്റെ നിലപാടുകള്‍ സാമൂഹ്യ മാധ്യമങ്ങള്‍ വഴി പ്രകടിപ്പിച്ചത്.
പല ലീഗുകളിലെയും നിരവധി ക്ലബ്ബുകളുമായി എന്നെ ബന്ധപ്പെടുത്തുന്ന വാര്‍ത്തകളും കഥകളും പതിവായി വരുന്നുണ്ട് എന്നാല്‍ സത്യം അറിയാന്‍ ആരും ശ്രമിക്കുന്നില്ല എന്നും താരം കൂട്ടിച്ചേര്‍ത്തു. വരുന്ന വാര്‍ത്തകളും റിപ്പോര്‍ട്ടുകളും പാടെ നിഷേധിച്ചുകൊണ്ടാണ് താരം നിലവില്‍ രംഗത്തെത്തിയിട്ടുള്ളത്.