സൗദി അറേബ്യയിലെ കൂടുതല്‍ തൊഴില്‍ മേഖലകളില്‍നിന്ന് പ്രവാസികള്‍ പുറത്താവും. തപാല്‍, പാഴ്സല്‍ ഗതാഗത രംഗത്തെ 14 തൊഴില്‍ മേഖലകളില്‍ സമ്ബൂര്‍ണ സ്വദേശിവത്കരണം ശനിയാഴ്ച മുതല്‍ നടപ്പായി.ഗതാഗത-ലോജിസ്റ്റിക്‌സ് മന്ത്രാലയം, ഗതാഗത അതോറിറ്റി എന്നിവയുടെ സഹകരണത്തോടെയാണ് ഈ തീരുമാനം നടപ്പാക്കുന്നത്.
തപാല്‍ പ്രവര്‍ത്തനങ്ങളും പാഴ്സല്‍ ഗതാഗതവും സ്വദേശിവത്ക്കരിക്കാനുള്ള തീരുമാനത്തില്‍ ആദ്യഘട്ടത്തില്‍ 14 തപാല്‍ തൊഴില്‍ മേഖലകളെയാണ് 100 ശതമാനം സ്വദേശിവത്കരിക്കുന്നത്.ശുചീകരണത്തൊഴിലാളികളെയും ചരക്ക് കയറ്റിറക്ക് തൊഴിലാളികളെയും ഈ നിയമത്തില്‍നിന്ന് ഒഴിവാക്കിയിട്ടുണ്ട്.
ഇലക്‌ട്രോണിക് പ്ലാറ്റ്‌ഫോമുകള്‍ വഴിയുള്ള വിതരണ സേവനങ്ങള്‍, പ്രാദേശികവും അന്തര്‍ദേശീയവുമായ പാഴ്‌സലുകളുടെ ഗതാഗതം, പാഴ്‌സലുകളുടെ പ്രാദേശിക വിതരണം, കൊറിയര്‍ പ്രവര്‍ത്തനങ്ങള്‍, ബാഗ് മെയിലും തപാല്‍ പാഴ്സലുകളും സ്വീകരിക്കുന്നതിനും വിതരണം ചെയ്യുന്നതിനും കൊണ്ടുപോകുന്നതിനുമുള്ള ജോലികള്‍, പോസ്റ്റ് ഓഫീസ് മാനേജ്മെന്‍റ് സേവനങ്ങള്‍, തപാല്‍ ലോജിസ്റ്റിക് സേവനങ്ങള്‍, സ്വകാര്യ തപാല്‍ കാരിയറുകളുടെ പ്രവര്‍ത്തനങ്ങള്‍, സ്വകാര്യ തപാല്‍ സേവനങ്ങളും വിതരണവും, സാധാരണ മെയില്‍, എക്സ്പ്രസ് മെയില്‍, മറ്റ് മെയില്‍ പ്രവര്‍ത്തനങ്ങള്‍, തപാല്‍ ഉരുപ്പടികള്‍ക്കും പാഴ്സലുകള്‍ക്കുമായുള്ള പ്രോസസ്സിങ്, സ്റ്റോറേജ് സേവനങ്ങള്‍ എന്നിവ സ്വദേശിവത്കരണ തീരുമാനത്തിലുള്‍പ്പെടും.