അധികാര ഗര്‍വ്വിന്റെ ഉടുക്ക് കൊട്ടിയാല്‍ പേടിക്കുന്ന പ്രസ്ഥാനമല്ല കോണ്‍ഗ്രസെന്നും എറണാകുളം ഡിസിസി പ്രസിഡന്റിനെതിരായ പൊലീസ് കേസ് നിയമപരമായും രാഷ്ട്രീയപരമായും നേരിടുമെന്നും കെ.പി.സി.സി പ്രസിഡന്റ് കെ.സുധാകരന്‍ എംപി.ജനങ്ങളുടെ മൂര്‍ധാവില്‍ ഇടുത്തീപോലെ കെട്ടിവെച്ച നികുതിക്കൊള്ളയ്‌ക്കെതിരെയാണ് കോണ്‍ഗ്രസ് പ്രതിഷേധിക്കുന്നത്.
ജനങ്ങള്‍ക്ക് വേണ്ടി കോണ്‍ഗ്രസ് നിലകൊള്ളുമ്ബോള്‍ കേസെടുത്തും പിപ്പിടി കാട്ടിയും വിരട്ടി മൂലയ്ക്ക് ഇരുത്താമെന്നത് മുഖ്യമന്ത്രിയുടെ മിഥ്യധാരണയാണ്.കേസും കോടതിയും ഒരുപാട് കണ്ട പ്രസ്ഥാനമാണിത്. കെ.എസ്.യു പ്രവര്‍ത്തകയെ തെരുവില്‍ മുഖ്യമന്ത്രിക്ക് വേണ്ടി പുരുഷപോലീസ് കയറി പിടിച്ചിട്ട് എന്തു നടപടിയാണ് എടുത്തത്? സ്ത്രീത്വം അപമാനിക്കപ്പെട്ടെന്ന് ചൂണ്ടിക്കാട്ടി ആ പെണ്‍കുട്ടി നല്‍കിയ പരാതി പോലീസ് വലിച്ച്‌ കീറി ചവറ്റുകൊട്ടയിലിട്ടില്ലെ? ഇതാണോ എല്‍.ഡി.എഫ് സര്‍ക്കാരിന്റെ സ്ത്രീസുരക്ഷ. ജനങ്ങളെ തടവിലാക്കി യാത്ര ചെയ്യുന്ന മുഖ്യമന്ത്രി എന്ത് മനോനിലയിലാണ് ഇതെല്ലാം കാട്ടിക്കൂട്ടുന്നതെന്ന് മനസിലാവുന്നില്ലെന്നും സുധാകരന്‍ പറഞ്ഞു.