മികച്ച പ്രകടനമാണ് ന്യൂസിലന്‍ഡിനെതിരായ ആദ്യ ഏകദിനത്തില്‍ ശുഭ്മാന്‍ ഗില്‍ കാണികൾക്കുമുന്നിൽ കാഴ്ച്ചവെച്ചത്. ഡബിള്‍ സെഞ്ചുറി നേടിയ ഗില്‍ ഏകദിന ക്രിക്കറ്റില്‍ ഡബിള്‍ സെഞ്ചുറി നേടുന്ന അഞ്ചാമത്തെ ഇന്ത്യന്‍ താരമായി റെക്കോർഡ് സൃഷ്ടിച്ചിരിക്കുകയാണ്. ഇന്ന് ഗിൽ നേടിയ റെക്കോർഡിന് മറ്റൊരു പ്രത്യേകത കൂടിയുണ്ട്, ക്രിക്കറ്റ്റിന്റെ രാജാവ് സാക്ഷാൽ സച്ചിൻ ടെണ്ടുൽക്കറിന്റെ റെക്കോർഡ് ആണ് മറികടന്നിരിക്കുന്നത്.
149 പന്തില്‍ നിന്നും 19 ഫോറും 9 സിക്സും ഉള്‍പ്പടെ 208 റണ്‍സ് നേടിയാണ് ഗില്‍ പുറത്തായത്. മത്സരത്തിലെ ഈ പ്രകടനത്തോടെ ഏകദിന ക്രിക്കറ്റില്‍ ന്യൂസിലന്‍ഡിനെതിരെ ഏറ്റവും ഉയര്‍ന്ന വ്യക്തിഗത സ്കോര്‍ നേടുന്ന ബാറ്റ്സ്മാനെന്ന റെക്കോര്‍ഡ് ശുഭ്മാന്‍ ഗില്‍ കരസ്ഥമാക്കി. 1999 ല്‍ ഇതേ വേദിയില്‍ പുറത്താകാതെ 186 റണ്‍സ് നേടിയ സാക്ഷാല്‍ സച്ചിന്‍ ടെണ്ടുല്‍ക്കറെ പിന്നിലാക്കികൊണ്ടാണ് ഈ റെക്കോഡ് ഗില്‍ സ്വന്തമാക്കിയത്. 2007 ല്‍ 181 റണ്‍സ് നേടിയ മാത്യൂ ഹെയ്ഡനാണ് കിവികള്‍ക്കെതിരെ ഏറ്റവും ഉയര്‍ന്ന വ്യക്തിഗത സ്കോര്‍ നേടിയ ബാറ്റ്സ്മാനെന്ന നേട്ടത്തില്‍ ഗില്ലിനും സച്ചിന്‍ ടെണ്ടുല്‍ക്കര്‍ക്കും പിന്നിലുള്ളത്.