കോഴിക്കോട്: മെഡിക്കല്‍ കോളജ് പരിസരത്ത് മരത്തില്‍ തൂങ്ങിമരിച്ച നിലയില്‍ ആദിവാസി യുവാവിനെ കണ്ട സംഭവം ആത്മഹത്യയാണെന്ന് പോസ്റ്റുമോര്‍ട്ടം റിപ്പോര്‍ട്ട്.ശരീരത്തില്‍ മര്‍ദനമേറ്റ പാടുകളൊന്നുമില്ലെന്ന് ഫൊറന്‍സിക് സര്‍ജന്‍ അന്വേഷണ ഉദ്യോഗസ്ഥനായ മെഡിക്കല്‍ കോളജ് എ.സി.പിക്ക് മൊഴിനല്‍കി. കാല്‍മുട്ടിലും തുടയിലുമായി ആറ് ചെറിയ മുറിവുകളുണ്ട്. എന്നാല്‍ ഇത് മരത്തിന് മുകളിലേക്ക് കയറിയപ്പോള്‍ ഉണ്ടായതെന്നാണ് റിപ്പോര്‍ട്ടില്‍ പറയുന്നത്. കേസില്‍ ശാസ്ത്രീയ അന്വേഷണം ആവശ്യമാണെന്ന് കോഴിക്കോട് സിറ്റി പൊലീസ് കമ്മീഷ്ണര്‍ രാജ്പാല്‍ മീണ പറഞ്ഞു.വയനാട് മേപ്പാടി സ്വദേശി വിശ്വനാഥനെയാണ് (46) ശനിയാഴ്ച രാവിലെ മെഡിക്കല്‍ കോളജിനു സമീപം ആളൊഴിഞ്ഞ പറമ്ബില്‍ മരത്തില്‍ തൂങ്ങിമരിച്ച നിലയില്‍ നാട്ടുകാര്‍ കണ്ടെത്തിയത്. മോഷണം ആരോപിച്ച്‌ ചോദ്യംചെയ്യലിന് വിശ്വനാഥന്‍ ഇരയായിരുന്നു. ഇതിന് പിന്നാലെ കാണാതായ വിശ്വനാഥനെയാണ് അടുത്ത ദിവസം മരിച്ച നിലയില്‍ കണ്ടെത്തിയത്.
വിശ്വനാഥനെ ആള്‍ക്കൂട്ടം മര്‍ദിച്ചുവെന്ന വാദത്തില്‍ ഉറച്ചുനില്‍ക്കുകയാണ് കുടുംബം. അതുകൊണ്ട് തന്നെ ഇതുമായി ബന്ധപ്പെട്ട അന്വേഷണവും പൊലീസ് നടത്തിവരികയാണ്. മെഡിക്കല്‍ കോളജ് ആശുപത്രിയിലെ സ.സി.ടി.വി ദൃശ്യങ്ങളുള്‍പ്പെടെ പൊലീസ് പരിശോധിക്കുന്നുണ്ട്.