സി.പി.എം സംസ്ഥാന സെക്രട്ടറിയുടെ ജാഥക്ക് ഇടാന്‍ പറ്റിയ പേരാണ് ‘പ്രതിരോധ ജാഥ’ എന്ന് പ്രതിപക്ഷ നേതാവ് വി.ഡി.സതീശന്‍. അത്രയും വലിയ പ്രതിരോധത്തിലാണ് സി.പി.എം നില്‍ക്കുന്നത്. നാട്ടില്‍ നടക്കുന്ന എല്ലാ സാമൂഹിക വിപത്തുകളുടെയും പുറകില്‍ സി.പി.എം നേതാക്കളാണെന്നും വി.ഡി. സതീശന്‍ പറഞ്ഞു.
ലഹരികള്ളക്കടത്തില്‍ സി.പി.എം നേതാക്കള്‍, ക്വട്ടേഷന്‍ സംഘത്തില്‍ സി.പി.എം നേതാക്കള്‍, സ്വര്‍ണക്കള്ളക്കടത്തില്‍ സി.പി.എം അനുഭാവികള്‍, കള്ളക്കടത്ത് സ്വര്‍ണം പൊട്ടിച്ചെടുക്കുന്നതിലും സി.പി.എമ്മിന്റെ ആളുകള്‍. കൊലപാതകം നടത്തുന്നതും സ്ത്രീവിരുദ്ധ പ്രചാരണം നടത്തുന്നതും അശ്ലീല ചിത്രങ്ങള്‍ പ്രചരിപ്പിക്കുന്നതും സി.പി.എമ്മുകാര്‍. നാട്ടില്‍ കൊള്ളരുതാത്ത എന്ത് നടന്നാലും അതിന്റെയെല്ലാം പുറകില്‍ സി.പി.എം ഉണ്ട്.സി.പി.എമ്മിന്റെ ജീര്‍ണത ആരംഭിച്ചിരിക്കുകയാണ്. ബംഗാളിലെ ജീര്‍ണത കേരളത്തില്‍ തുടര്‍ഭരണം കിട്ടിയതോടെ ആരംഭിച്ചിരിക്കുകയാണ്. മുഖ്യമന്ത്രിയുടെ പ്രിന്‍സിപ്പല്‍ സെക്രട്ടറിയായിരുന്ന ആള്‍ സ്വര്‍ണക്കള്ളക്കടത്ത് കേസില്‍ ജയിലില്‍ പോയി. ലൈഫ് മിഷനില്‍ കോഴ വാങ്ങിയതിന്റെ പേരില്‍ രണ്ടാമതും അകത്തുപോയി.
ആകാശ് തില്ലങ്കേരിയെ പോലൊരു മൂന്നാംകിട ക്രിമിനലിന്റെ വിരല്‍തുമ്പില്‍ വിറക്കുകയാണ് സി.പി.എം. വിരട്ടുകയാണ്. ആകാശ് മോനെ വിഷമിപ്പിക്കരുതെന്നാണ് ഇപ്പോള്‍ പാര്‍ട്ടി താഴെക്കിടയിലെ അംഗങ്ങളോട് പറഞ്ഞിരിക്കുന്നത്. ആകാശ് മോന് വിഷമം വന്നാല്‍ ഏതൊക്കെ നേതാക്കളാണ് കൊലപാതകത്തിന് പിന്നിലുള്ളതെന്ന് വിളിച്ചുപറയുമെന്ന പേടിയാണ് -വി.ഡി. സതീശന്‍ പറഞ്ഞു.