കോണ്‍ഗ്രസ് നേതാവ് രാഹുല്‍ ഗാന്ധി നയിക്കുന്ന ഭാരത് ജോഡോ യാത്രയെ പുകഴ്ത്തി തമിഴ്‌നാട് മുഖ്യമന്ത്രി എം കെ സ്റ്റാലിന്‍. രാഹുല്‍ജിയുടെ പ്രസംഗങ്ങള്‍ രാജ്യത്തെ പ്രകമ്പനം ഉണ്ടാക്കുന്നു എന്ന് സ്റ്റാലിന്‍ കൂട്ടിച്ചേര്‍ത്തു. അതോടൊപ്പം രാജ്യത്തിന്റെ പ്രഥമ പ്രധാനമന്ത്രി ജവഹര്‍ലാല്‍ നെഹ്‌റുവിനെയും സ്റ്റാലിന്‍ അനുസ്മരിച്ചു.
മതേതരത്വവും സമത്വവും പോലുള്ള മൂല്യങ്ങള്‍ ഉയര്‍ത്തിപ്പിടിക്കാന്‍ നെഹ്‌റുവിനെയും മഹാത്മാഗാന്ധിയെയും പോലുള്ള നേതാക്കളെ രാജ്യത്തിന് ആവശ്യമാണ്. നെഹ്‌റുവിനെ കുറിച്ച് മുതിര്‍ന്ന കോണ്‍ഗ്രസ് നേതാവ് എം ഗോപണ്ണ എഴുതിയ ‘ മാമനിതാര്‍ നെഹ്‌റു ‘ എന്ന പുസ്തകം ചെന്നൈയില്‍ പ്രകാശനം ചെയ്യുകയാണ് സ്റ്റാലിന്റെ പരാമര്‍ശം. പ്രിയ സഹോദരന്‍ രാഹുല്‍ ഭാരത് ജോഡോ യാത്ര നടത്തുകയാണെന്നും കന്യാകുമാരിയില്‍ നിന്ന് അത് ഫ്‌ലാഗ് ഓഫ് ചെയ്യാന്‍ സാധിച്ചതില്‍ സന്തോഷം ഉണ്ടെന്നും അദ്ദേഹം പറഞ്ഞു.
‘രാഹുലിന്റെ പ്രസംഗങ്ങള്‍ രാജ്യത്തെ പ്രകമ്പനം സൃഷ്ടിക്കുന്നു . അദ്ദേഹത്തിന്റെത് തിരഞ്ഞെടുപ്പ് രാഷ്ട്രീയമോ കക്ഷിരാഷ്ട്രീയമോ അല്ല . പ്രത്യയശാസ്ത്രത്തിന്റെ രാഷ്ട്രീയമാണ് സംസാരിക്കുന്നത് അതുകൊണ്ടാണ് ചില വ്യക്തികള്‍ അദ്ദേഹത്തെ ശക്തമായി എതിര്‍ക്കുന്നത്. രാഹുലിന്റെ സംസാരം ചിലപ്പോള്‍ നെഹ്‌റുവിനെ പോലെയാണ് , നെഹ്‌റുവിന്റെ കൊച്ചുമകന്‍ അങ്ങനെ സംസാരിച്ചില്ലെങ്കിലേ അത്ഭുതമുള്ളൂ. മഹാത്മാഗാന്ധിയുടെയും നെഹ്‌റുവിന്റെയും അനന്തരാവകാശികളുടെ വര്‍ത്തമാനങ്ങളില്‍ ഗോഡ്‌സെയുടെ പിന്‍ഗാമികള്‍ക്ക് കയ്‌പേ തോന്നു ‘ – സ്റ്റാലിന്‍ പറഞ്ഞു