കൊച്ചി: മദ്യപിച്ച്‌ വാഹനമോടിച്ച ഡ്രൈവര്‍മാരെ കൊണ്ട് ഇമ്പോസിഷന്‍ എഴുതിച്ച്‌ പൊലീസ്. ഇനി മദ്യപിച്ച്‌ വാഹനം ഓടിക്കില്ല എന്ന് ഡ്രൈവര്‍മാരെക്കൊണ്ട് 1000 തവണ എഴുതിച്ചു.തൃപ്പുണിത്തറ പൊലീസ് സ്റ്റേഷനിലാണ് സംഭവം. സ്വകാര്യ ബസ് അപകടത്തെ തുടര്‍ന്ന് ഒരാള്‍ മരിച്ചതിന് പിന്നാലെ വ്യാപകമായ പരിശോധന കൊച്ചിയില്‍ നടന്നിരുന്നു.
ഇതിനെ തുടര്‍ന്ന് ഇന്ന് തൃപ്പൂണത്തുറ പൊലീസ് സ്റ്റേഷന്‍ പരിധിയില്‍ 16 ഡ്രൈവര്‍മാരെയാണ് മദ്യപിച്ച്‌ വാഹനമോടിച്ചതിന് പൊലീസ് പിടികൂടിയത്. ഇതില്‍ രണ്ട് കെ.എസ്.ആര്‍.ടി.സി ഡ്രൈവര്‍മാരും നാല് സ്‌കൂള്‍ ബസ് ജീവനക്കാരും ഉള്‍പ്പെടുന്നു. ഇവരെ ബോധവത്ക്കരിക്കുകയെന്ന ലക്ഷ്യത്തോടെയാണ് ഇത്തരമൊരു നിര്‍ദേശം നല്‍കിയത്. എങ്കിലും പിഴ ഈടാക്കുന്നതടക്കമുള്ള കര്‍ശന നടപടികളുമായി മുന്നോട്ട് പോകുമെന്ന് പൊലീസ് പറഞ്ഞു.