ചെറുതോണി: ആംബുലന്‍സില്‍ യുവതികളെ പീഡിപ്പിക്കാന്‍ ശ്രമിച്ചയാളെ അറസ്റ്റ് ചെയ്തു. ചെറുതോണി സ്വദേശി കദളിക്കുന്നേല്‍ കുട്ടപ്പന്‍ എന്ന ലിസനാണ് (40) അറസ്റ്റിലായത്. യുവതികളുടെ മൊഴിയുടെ അടിസ്ഥാനത്തില്‍ അറസ്റ്റ് ചെയ്ത പ്രതിയെ പീരുമേട് കോടതിയില്‍ ഹാജരാക്കും. ലാബിലെ ആംബുലന്‍സ് ഡ്രൈവറാണ് ലിസണ്‍. ഇതേ ലാബിലെ ജീവനക്കാരാണ് പരാതിക്കാരായ യുവതികളും. ലാബ് ജീവനക്കാരുടെ ക്രിസ്മസ് ആഘോഷത്തിനുശേഷം വീട്ടില്‍ കൊണ്ടുചെന്നാക്കുന്നതിനാണ് ലാബിന്റെ ആംബുലന്‍സില്‍ ലിസണോടൊപ്പം യുവതികളെ വിടുന്നത്. മദ്യപിച്ചിരുന്ന ലിസണ്‍ തടിയമ്പാടിന് സമീപത്തുവെച്ച് പിന്നിലിരുന്ന യുവതിയെ കടന്നുപിടിക്കാന്‍ ശ്രമിച്ചു.
ഇതോടെ ബഹളംവെച്ച യുവതി വാഹനം നിര്‍ത്തിച്ച് ഇറങ്ങിയോടി.പിന്നാലെയെത്തിയ ലിസണ്‍ യുവതിയെ അനുനയിപ്പിച്ച് വാഹനത്തില്‍ തിരികെയെത്തിച്ച് യാത്ര തുടര്‍ന്നു. ഇതിനുശേഷം കരിമ്പന് സമീപത്ത് ആളൊഴിഞ്ഞ വനപ്രദേശത്ത് വാഹനം നിര്‍ത്തി വാഹനത്തിന്റെ പിന്നില്‍ കയറിയും യുവതികളെ ആക്രമിക്കാന്‍ ശ്രമിച്ചു. യുവതികള്‍ ബഹളം കൂട്ടിയതോടെ ഇയാള്‍ വീണ്ടും വാഹനം മുന്നോട്ട് കൊണ്ടുപോവുകയായിരുന്നു.ഇടുക്കി പൊലീസ് ആശുപത്രിയിലെത്തി യുവതികളുടെ മൊഴി രേഖപ്പെടുത്തി. തുടര്‍ന്ന് പ്രതിയുടെ വീട്ടിലെത്തി കസ്റ്റഡിയില്‍ എടുക്കുകയായിരുന്നു. സി.ഐ ബി. ജയനൊപ്പം മുഹമ്മദാലി, എസ്.സി.പി.ഒമാരായ നജീബ്, ജീന്‍, സ്റ്റാന്‍ലി എന്നിവര്‍ ചേര്‍ന്നാണ് പ്രതിയെ പിടികൂടിയത്.