ന്യൂഡല്‍ഹി: ദേശീയ തലത്തില്‍ സംയുക്ത പ്രതിപക്ഷ ഐക്യത്തിനുള്ള നീക്കവുമായി മമത ബാനര്‍ജി ഡല്ഹിയിലേക്ക്. ബുധനാഴ്ച സോണിയ ഗാന്ധിയടക്കമുള്ള പ്രതിപക്ഷ കക്ഷി നേതാക്കളുമായി കൂടിക്കാഴ്ച നടത്തും. പെഗാസസ് ഫോണ്‍ ചോര്‍ത്തലിലടക്കം കേന്ദ്രസര്‍ക്കാരിനെതിരെ രൂക്ഷവിമര്‍ശനമുയര്‍ത്തിയ മമത പ്രധാനമന്ത്രിയേയും കാണും.
2024 ലെ ലോക്‌സഭ തെരഞ്ഞെടുപ്പ് ലക്ഷ്യമാക്കിയാണ് മമത ബാനര്‍ജിയുടെ ഡല്‍ഹി യാത്ര. തൃണമൂല്‍ കോണ്‍ഗ്രസിന്റെ പാര്‍ലമെന്ററി പാര്‍ട്ടി നേതാവായി മമത ബാനര്‍ജിയെ തെരഞ്ഞെടുത്തത് ദേശീയ രാഷ്ട്രീയത്തില്‍ സജീവമാകുന്നതിന്റെ സൂചനയാണ്. ഇന്ന് വൈകുന്നേരം അഞ്ച് മണിക്ക് ഡല്‍ഹിലെത്തുന്ന മമത തുടര്‍ ദിവസങ്ങളില്‍ നടത്തുന്നത് നിര്‍ണ്ണായക നീക്കങ്ങളായിരിക്കും. സോണിയ ഗാന്ധി, ശരദ് പവാര്‍ തുടങ്ങിയ നേതാക്കളെ മമത കാണും.
കേന്ദ്രസര്‍ക്കാരിനെതിരെ പോരാടുന്ന സമാന മനസ്‌കരായ മറ്റ് പാര്‍ട്ടി നേതാക്കളുമായുള്ള കൂടിക്കാഴ്ചയും നാല് ദിവസത്തെ ഡല്‍ഹി പര്യടനത്തില്‍ നിശ്ചയിച്ചിട്ടുണ്ട്. ബിജെപിക്കെതിരായി സംസ്ഥാനങ്ങളില്‍ സഖ്യം രൂപപ്പെടണമെന്നും ദേശീയ തലത്തിലെ നീക്കത്തെ ഇത് ഏറെ സഹായിക്കുമെന്നുമുള്ള നിര്‍ദ്ദേശമാകും നേതാക്കളുമായുള്ള കൂടിക്കാഴ്ചയില്‍ മമത ബാനര്‍ജി മുന്‍പോട്ട് വെക്കുക.
പാര്‍ലമെന്റിന്റെ സെന്‍ട്രല്‍ ഹാള്‍ സന്ദര്‍ശനവും മമതയുടെ അജണ്ടയിലുണ്ട്. വിവര ചോര്‍ച്ച ഭയന്ന് സ്വന്തം ഫോണിന്റെ ക്യാമറ പ്ലാസ്റ്റര്‍ ഒട്ടിച്ച് നടക്കേണ്ട ഗതികേടിലാണെന്ന് പെഗാസസ് വിവാദത്തില്‍ രൂക്ഷ വിമര്‍ശം ഉന്നയിച്ചതിന് പിന്നാലെയാണ് മമത ബാനര്‍ജി പ്രധാനമന്ത്രിയുടെ മുമ്പിലെത്തുന്നത്. ചൊവ്വാഴ്ച വൈകുന്നേരം നാല് മണിക്ക് നടക്കുന്ന കൂടിക്കാഴ്ചയില്‍ കൊവിഡ് വിഷയത്തിലടക്കമുള്ള കേന്ദ്ര നിലപാടില്‍ മമത ബാനര്‍ജി ശക്തമായ പ്രതിഷേധം അറിയിക്കുമെന്നാണ് സൂചന. രാഷ്ട്രപതി രാംനാഥ് കോവിന്ദിനേയും മമത ബാനര്‍ജി കാണും. അതേ സമയം കോണ്‍ഗ്രസുമായി മമത അടുക്കുന്നതായുള്ള സൂചനകളാണ് പുറത്തു വരുന്നത്. ജൂലൈ 21ന് മമത ബാനര്‍ജിയുടെ വിര്‍ച്വല്‍ റാലിയില്‍ മുതിര്‍ന്ന കോണ്‍ഗ്രസ് നേതാക്കളായ ദിഗ്വിജയ് സിങും പി ചിദംബരവും പങ്കെടുത്തത് ഇരുപാര്‍ട്ടികളും തമ്മില്‍ രൂപപ്പെട്ടിരിക്കുന്ന പുതിയ ബന്ധത്തിന്റെ സൂചനയായി നിരീക്ഷകര്‍ വായിക്കുന്നു.
മമതയുടെ കടുത്ത വിമര്‍ശകനായ ബംഗാള്‍ കോണ്‍ഗ്രസ് അധ്യക്ഷന്‍ അധീര്‍ രഞ്ജന്‍ ചൗധരി സഖ്യനീക്കങ്ങളെ എതിര്‍ക്കുമോ എന്ന ആശങ്ക കോണ്‍ഗ്രസ് ഹൈക്കമാന്‍ഡിനുണ്ടായിരുന്നു. എന്നാല്‍ അത്തരം ഒരു ആശങ്കയുടെയും ആവശ്യമില്ലെന്ന നിലപാടാണ് അധീര്‍ രഞ്ജന്‍ ചൗധരി ഇപ്പോള്‍ സ്വീകരിക്കുന്നത്. ബംഗാളിലെ കോണ്‍ഗ്രസ് വേറെ തന്നെ ഒരു സംവിധാനമല്ല. കോണ്‍ഗ്രസിന്റെ സംസ്ഥാന യൂണിറ്റാണ് ഞങ്ങള്‍.
തൃണമൂല്‍ കോണ്‍ഗ്രസുമായി കൈകോര്‍ക്കാനാണ് ദേശീയ നേതൃത്വം പറയുന്നതെങ്കില്‍ ഞങ്ങളത് ചെയ്യുമെന്നാണ് അധീര്‍ രഞ്ജന്‍ ചൗധരി പ്രതികരിച്ചത്. തൃണമൂല്‍ കോണ്‍ഗ്രസായി സഖ്യത്തിലെത്താനാണ് കോണ്‍ഗ്രസ് ശ്രമമെങ്കില്‍ നിലവിലെ സഖ്യകക്ഷിയായ സിപിഐഎം നയിക്കുന്ന ഇടതുമുന്നണി ബന്ധം അവസാനിപ്പിച്ചേക്കും.