ന്യൂനമര്‍ദ്ദം ശക്തിപ്പെടില്ല, കേരളത്തില്‍ മഴ കൂടും

കൊച്ചി: മണ്‍സൂണ്‍ ന്യൂനമര്‍ദം പ്രതീക്ഷച്ചതുപോലെ ശക്തിപ്പെട്ടില്ലെങ്കിലും കേരളം ഉള്‍പ്പെടെയുള്ള സംസ്ഥാനങ്ങളില്‍ മഴ കുറയാന്‍ ഇടയാക്കില്ലെന്ന് നിരീക്ഷണം. കനത്ത മഴ തുടരുന്ന വടക്കന്‍ കേരളത്തിനൊപ്പം മധ്യ, തെക്കന്‍ ജില്ലകളിലേക്കും മഴ വ്യാപിക്കാന്‍ അനുകൂലമാണ് ഇപ്പോഴത്തെ അന്തരീക്ഷസ്ഥിതിയെന്ന് കാലാവസ്ഥ വിദഗ്ധരുടെ കൂട്ടായ്മയായ മെറ്റ്ബീറ്റ് വെതറിലെ നിരീക്ഷകര്‍ അഭിപ്രായപ്പെട്ടു. വടക്കന്‍ കേരളത്തില്‍ കഴിഞ്ഞ ദിവസം മുതല്‍ മഴ ശക്തിയാര്‍ജിച്ചു. കേന്ദ്ര കാലാവസ്ഥാ വകുപ്പിന്റെ മാപിനികളില്‍ നിന്നു ലഭ്യമായ വിവരം പ്രകാരം കാസര്‍കോട് കുഡ്‌ലു സ്‌റ്റേഷനില്‍ കഴിഞ്ഞ 24 മണിക്കൂറില്‍ 7.5 സെ.മീ മഴ ലഭിച്ചു. വെള്ളരിക്കുണ്ട് (9.2), പിലിക്കോട് (10.4), പയ്യന്നൂര്‍ (9.1), ഇരിക്കൂര്‍ (7.6), മട്ടന്നൂര്‍ (9.3) വയനാട് പടിഞ്ഞാറത്തറ ഡാം (4.6), കോഴിക്കോട് കക്കയം (4.9), കണ്ണൂര്‍ ചെറുതാഴം (5.1) എന്നിങ്ങനെയാണ് വിവിധ സ്റ്റേഷനുകളിലെ മഴ.

സംസ്ഥാനത്ത് മറ്റു ജില്ലകളിലും 1 മുതല്‍ 6 സെ.മി വരെ മഴ ലഭിച്ചു. വടക്കന്‍ കേരളത്തിലാണ് കൂടുതല്‍ മഴ ലഭിച്ചത്. ഈ സാഹചര്യം അടുത്ത 24 മണിക്കൂര്‍ കൂടി തുടരും. മഹാരാഷ്ട്ര തീരം മുതല്‍ ലക്ഷദ്വീപ് വരെ ന്യൂനമര്‍ദപാത്തി രൂപം കൊണ്ടതാണ് വടക്കന്‍ കേരളത്തില്‍ മഴ ശക്തിയാര്‍ജിക്കാന്‍ കാരണം. അടുത്ത 24 മണിക്കൂറില്‍ കൂടുതലല്‍ ജില്ലകളിലേക്ക് വ്യാപിക്കും. ഇടവിട്ട മഴയാണ് പ്രതീക്ഷിക്കുന്നത്.

കാസര്‍കോട് മുതല്‍ കോഴിക്കോട് വരെയുള്ള ജില്ലകളില്‍ ഇടവേളകള്‍ കുറഞ്ഞ് കൂടുതല്‍ മഴ ലഭിക്കും. വയനാട് ജില്ലയുടെ പടിഞ്ഞാറന്‍ അതിര്‍ത്തിയിലും ഇതേ കാലാവസ്ഥയാകും ഉണ്ടാകുക. വയനാട് ജില്ലയുടെ കിഴക്കന്‍ മേഖലയില്‍ മഴ കുറയും. മലപ്പുറം, പാലക്കാട് ജില്ലകളില്‍ ഇടവേളകളോടെ ശക്തമായ മഴക്ക് സാധ്യതയുണ്ട്. തൃശൂരില്‍ ഇടവേളകളോടുകൂടിയ ഇടത്തരം മഴയും എറണാകുളം, ഇടുക്കി, ആലപ്പുഴ, പത്തനംതിട്ട ജില്ലകളില്‍ ഇടവേളകളോടെ ഇടത്തരം മഴയോ ഒറ്റപ്പെട്ട പ്രദേശങ്ങളില്‍ ശക്തമായ മഴയോ പ്രതീക്ഷിക്കാം. കൊല്ലം, തിരുവനന്തപുരം ജില്ലകളിലും സമാന തോതിലായിരിക്കും മഴ.