ഖത്തര്‍ ലോകകപ്പിലെ രണ്ടാം ഫൈനലിസ്റ്റുകളെ ഇന്നറിയാം. ഇന്ത്യന്‍ സമയം അര്‍ദ്ധരാത്രി 12.30ന് അരങ്ങേറുന്ന സെമിഫൈനല്‍ മത്സരത്തില്‍ ഫ്രാന്‍സ് മൊറോക്കോയെ നേരിടും.ദോഹയിലെ അല്‍ ബയ്ത് സ്റ്റേഡിയത്തില്‍ വെച്ചാകും ഈയൊരു മത്സരം അരങ്ങേറുക. ഇന്നത്തെ വിജയികളാവും വരുന്ന ഞായറാഴ്ച നടക്കുന്ന ഫൈനല്‍ പോരാട്ടത്തില്‍ അര്‍ജന്‍്റീനയെ നേരിടുക. കടലാസിലെ കണക്കുകള്‍ പരിഗണിക്കുമ്പോള്‍ സാധ്യതകള്‍ കൂടുതല്‍ ഫ്രാന്‍സിന് ആണെങ്കിലും മൊറോക്കോയെ വിലകുറച്ച്‌ കാണുവാന്‍ കഴിയില്ല.
ഇതുവരെ ഒരു ഗോള്‍ പോലും മൊറോക്കോയുടെ പോസ്റ്റിലേക്കടിക്കാന്‍ എതിരാളികള്‍ക്കായിട്ടില്ല. നാല് സ്ട്രൈക്കര്‍മാരുള്ള മുന്നേറ്റംവഴി ഗോളടിച്ച്‌ കൂട്ടുകയാണ് എംബാപ്പെയും ജിറൂദും. ഗോളിലേക്ക് വഴിയൊരുക്കാന്‍ ഗ്രീസ്മാനും ഡെംബലെയുമുണ്ട്. അപ്രതീക്ഷിത വെടിയുണ്ട പായിക്കാന്‍ യുവതാരം ചുവാമെനിയും മധ്യനിരയില്‍.
തുടര്‍ച്ചയായ രണ്ടാം ഫൈനലാണ് നിലവിലെ ചാമ്ബ്യന്‍മാരായ ഫ്രാന്‍സ് ലക്ഷ്യമിടുന്നത്. മൊറോക്കോ ലോകകപ്പ് ചരിത്രത്തില്‍ ആദ്യ ആഫ്രിക്കന്‍ ടീമിന്‍റെ കലാശപ്പോരിനുള്ള ടിക്കറ്റുറപ്പിക്കാന്‍ ഇറങ്ങുന്നു.