നവകേരള സദസ്സിനായി സ്‌കൂള്‍ മതിലുകള്‍ പൊളിച്ച സംഭവത്തില്‍ വിമര്‍ശനവുമായി ഹൈക്കോടതി. സ്‌കൂള്‍ മതില്‍ പൊളിക്കുന്നത് എന്തിനെന്നും പൊതുപണമല്ലേ നഷ്ടപ്പെടുന്നതെന്നും ഹൈക്കോടതി ചോദിച്ചു.
കേസില്‍ ചീഫ് സെക്രട്ടറിയെ കക്ഷി ചേര്‍ക്കാന്‍ ഡിവിഷന്‍ ബെഞ്ച് നിര്‍ദ്ദേശം നല്‍കി. അഞ്ചിടങ്ങളില്‍ സംഭവിച്ച് പോയെന്നായിരുന്നു സര്‍ക്കാര്‍ അഭിഭാഷകന്‍ നല്‍കിയ മറുപടി. പൊളിച്ച മതില്‍ പുനര്‍ നിര്‍മ്മിക്കുമെന്നും സര്‍ക്കാര്‍ വിശദീകരിച്ചു.
കൊല്ലം ചക്കുവള്ളി ക്ഷേത്ര മൈതാനിയില്‍ നവകേരള സദസ്സിനായി വേദി ഒരുക്കിയത് ചോദ്യം ചെയ്ത് നല്‍കിയ ഹര്‍ജിയിലാണ് വിമര്‍ശനം. സദസ്സിനായി തയ്യാറാക്കുന്ന വേദിയുടെയും സദസ്സിന്റെയും രൂപരേഖ സമര്‍പ്പിക്കണം.
നവകേരള സദസ്സ് ക്ഷേത്രത്തെ ബാധിക്കുമോയെന്ന് വിശദമാക്കണമെന്നും ഹൈക്കോടതി നിര്‍ദ്ദേശിച്ചു. കൊല്ലം ജില്ലാ കളക്ടറും തിരുവിതാംകൂര്‍ ദേവസ്വം ബോര്‍ഡും സത്യവാങ്മൂലം നല്‍കണമെന്നാണ് ഹൈക്കോടതി ഡിവിഷന്‍ ബെഞ്ചിന്റെ നിര്‍ദ്ദേശം.