ഹനോയ്: വിയറ്റ്‌നാമില്‍ അപകടകാരയായ പുതിയ കോവിഡ് വകദേഭത്തെ കണ്ടെത്തി. വായുവിലൂടെ അതിവേഗം പടരുന്ന ഇവ ഇന്ത്യയില്‍ അതിവേഗ രോഗവ്യാപനത്തിന് കാരണമായ B.1.617 വകഭേദത്തിന്റെയും യുകെ വകഭേദത്തിന്റെയും സങ്കരയിനമാണെന്ന് വിയറ്റ്‌നാം ആരോഗ്യമന്ത്രി ഗുയന്‍ തങ് ലോങ് അറിയിച്ചു.
രാജ്യത്തിന്റെ പകുതിയിലേറെ പ്രദേശത്തേക്കും പുതിയ വൈറസ് വകഭേദം വ്യാപിച്ചതായാണ് റിപ്പോര്‍ട്ട്. ഹനോയ്, ഹോ ചിമിന്‍ തുടങ്ങിയ വ്യവസായ മേഖലകളിലേക്കും വൈറസ് വകഭേദം വ്യാപിച്ചത് ആശങ്ക സൃഷ്ടിക്കുന്നുണ്ട്. നിലവില്‍ 6,700ല്‍ പരം കേസുകളും 47 മരണവുമാണ് വിയറ്റ്‌നാമില്‍ റിപ്പോര്‍ട്ട് ചെയ്തിരിക്കുന്നത്.
പുതിയ വകഭേദവുമായി ബന്ധപ്പെട്ട് എത്ര കേസുകള്‍ രാജ്യത്ത് റിപ്പോര്‍ട്ട് ചെയ്തു എന്നതില്‍ ആരോഗ്യമന്ത്രാലയം കണക്കുകള്‍ പുറത്തുവിട്ടിട്ടില്ല.
കഴിഞ്ഞ വര്‍ഷം കോവിഡ് വ്യാപനത്തെ വിജയകരമായി അതിജീവിച്ച വിയറ്റ്‌നാമില്‍ നിലവിലെ കേസുകള്‍ ആശങ്ക സൃഷ്ടിക്കുന്നുണ്ട്. ഈ വര്‍ഷം ഏപ്രിലിനു ശേഷമാണ് കേസുകള്‍ വര്‍ധിച്ചു തുടങ്ങിയത്. പുതിയ വകഭേദം കൂടി കണ്ടെത്തിയതോടെ കൂടുതല്‍ നിയന്ത്രണങ്ങളിലേക്ക് കടക്കുകയാണ് രാജ്യം.