എഡിഎം നവീന്‍ ബാബുവിന്റെ മരണത്തില്‍ കണ്ണൂര്‍ ജില്ലാ പഞ്ചായത്ത് മുന്‍ പ്രസിഡന്റ് പി.പി ദിവ്യക്ക് മുന്‍കൂര്‍ ജാമ്യം നിഷേധിച്ചതില്‍ പ്രതികരണവുമായി നവീന്‍ ബാബുവിന്റെ കുടുംബം. ആശ്വാസകരമായ വിധിയാണെന്ന് കുടുംബം പറഞ്ഞു. പി പി ദിവ്യയെ അറസ്റ്റ് ചെയ്യണമെന്നും നവീന്‍ ബാബുവിന്റെ ഭാര്യ ആവശ്യപ്പെട്ടു. സംഭവങ്ങള്‍ നടക്കുന്ന സമയം കലക്ടര്‍ യോഗത്തില്‍ ഇടപെടേണ്ട ആളായിരുന്നുവെന്നും അവര്‍ കൂട്ടിച്ചേര്‍ത്തു.
കേസിന്റെ നിയമവശം മാത്രമാണ് നോക്കിയതെന്നും രാഷ്ട്രീയ വശങ്ങള്‍ നോക്കിയിരുന്നില്ലെന്നും കുടുംബം പറഞ്ഞു. പ്രതി മേല്‍ക്കോടതിയില്‍ പോയാല്‍ വാണ്ടും നിയമപോരാട്ടം തുടരുമെന്നും കുടുംബം വ്യക്തമാക്കി. നവീന്റെ യാത്രയപ്പ് വേദിയില്‍ പി പി ദിവ്യ എത്തിയത് ഗൂഢാലോചനയുടെ ഭാഗമായിട്ടാണെന്നും കുടുംബം ആരോപിച്ചു.
തലശ്ശേരി പ്രിന്‍സിപ്പല്‍ സെഷന്‍സ് കോടതി ജഡ്ജി കെ.ടി നിസാര്‍ അഹമ്മദ് ആണ് ജാമ്യാപേക്ഷ തള്ളിയത്. ദിവ്യയെ ഉടന്‍ അറസ്റ്റ് ചെയ്യണമെന്ന് പ്രതിപക്ഷ നേതാവ് വി.ഡി സതീശനും ആവശ്യപ്പെട്ടു.