2019 ബാച്ചിലെ അവസാന വര്‍ഷ എംബിബിഎസ് വിദ്യാര്‍ത്ഥികള്‍ക്കുള്ള ദേശീയ എക്സിറ്റ് ടെസ്റ്റ് (NExT) മാറ്റിവച്ചതായി പ്രഖ്യാപിച്ച് നാഷണല്‍ മെഡിക്കല്‍ കമ്മീഷന്‍ (എന്‍എംസി). വ്യാഴാഴ്ചയാണ് ഇതുമായി ബന്ധപ്പെട്ട അറിയിപ്പ് പുറത്ത് വന്നത്. ആരോഗ്യ മന്ത്രാലയം അയച്ച നിര്‍ദ്ദേശത്തെ തുടര്‍ന്നാണ് തീരുമാനമെന്ന് എന്‍എംസി പറഞ്ഞു.
എങ്കിലും, ജൂലൈ 28 ന് നടക്കാനിരിക്കുന്ന മോക്ക് NExT നെ കുറിച്ച് ഒരു പ്രഖ്യാപനവും ഉണ്ടായില്ല. എന്‍എംസി അടുത്തിടെ NExT 2023 ന്റെ നിയന്ത്രണങ്ങള്‍ അവതരിപ്പിച്ചു. ഒരു വര്‍ഷത്തില്‍ രണ്ട് ഘട്ടങ്ങളിലായി പരീക്ഷ നടത്തുമെന്ന് രൂപരേഖ നല്‍കി.
വിദ്യാര്‍ത്ഥികള്‍ NExT സ്റ്റെപ്പ് 1 പരീക്ഷ വിജയിച്ചു കഴിഞ്ഞാല്‍, വിദ്യാര്‍ത്ഥികള്‍ ഒരു വര്‍ഷത്തെ ഇന്റേണ്‍ഷിപ്പ് പൂര്‍ത്തിയാക്കേണ്ടതുണ്ട്. ബിരുദാനന്തര (പിജി) കോഴ്‌സുകളിലേക്കുള്ള പ്രവേശനത്തിന് അവരുടെ NExT സ്റ്റെപ്പ് 1 സ്‌കോര്‍ പരിഗണിക്കും. ഇന്റേണ്‍ഷിപ്പ് പൂര്‍ത്തിയാക്കിയ ശേഷം, ഇന്ത്യയില്‍ മോഡേണ്‍ മെഡിസിന്‍ പരിശീലിക്കുന്നതിനുള്ള ലൈസന്‍സും രജിസ്‌ട്രേഷനും ലഭിക്കുന്നതിന് മെഡിക്കല്‍ വിദ്യാര്‍ത്ഥികള്‍ NExT സ്റ്റെപ്പ് 2 പരീക്ഷ പാസാകേണ്ടതുണ്ട്.