2024 XY5, 2024 XB6 എന്ന രണ്ട് കൂറ്റന്‍ ഛിന്നഗ്രഹങ്ങള്‍ ഇന്ന് ഭൂമിയുടെ അടുത്തുകൂടെ കടന്നുപോയതായി നാസ. എന്നാല്‍ ഈ സംഭവം ഭൂമിക്ക് യാതൊരു ഭീഷണിയും ഉണ്ടാക്കിയിട്ടില്ല.
2024 XY5 എന്ന ഛിന്നഗ്രഹം മണിക്കൂറില്‍ 10,805 മൈല്‍ വേഗതയില്‍ സഞ്ചരിച്ചുകൊണ്ട് ഭൂമിയില്‍ നിന്ന് ഏകദേശം 2,180,000 മൈല്‍ അകലെ വച്ച് കടന്നുപോയതായും 56 അടി വ്യാസമുള്ള 2024 XB6 എന്ന ഛിന്നഗ്രഹം മണിക്കൂറില്‍ 14,780 മൈല്‍ വേഗതയില്‍ സഞ്ചരിച്ചുകൊണ്ട് ഭൂമിയില്‍ നിന്ന് ഏകദേശം 4,150,000 മൈല്‍ അകലെ കൂടിയാണ് കടന്നുപോയതായും റിപ്പോര്‍ട്ട് ചെയ്തു.
ഇത്തരം ഛിന്നഗ്രഹങ്ങള്‍ ഏകദേശം 4.6 ബില്യണ്‍ വര്‍ഷങ്ങള്‍ക്ക് മുമ്പ് രൂപപ്പെട്ട ആദ്യകാല സൗരയൂഥത്തിന്റെ അവശിഷ്ടങ്ങളാണ്. ഇവയെ പഠിക്കുന്നത് ഭൂമിയുടെ ഉത്ഭവത്തെക്കുറിച്ചുള്ള വിവരങ്ങള്‍ ലഭിക്കാന്‍ സഹായിക്കുന്നു.
ഭൂമിക്ക് സമീപമുള്ള വസ്തുക്കളെ (NEOs) നിരീക്ഷിക്കാന്‍ നാസ നൂതന സംവിധാനങ്ങള്‍ ഉപയോഗിക്കുന്നു. റഡാര്‍ സാങ്കേതികവിദ്യ ഉപയോഗിച്ച്, ജെറ്റ് പ്രൊപ്പല്‍ഷന്‍ ലബോറട്ടറി ഛിന്നഗ്രഹ പാതകള്‍ കൃത്യമായി കണക്കാക്കുന്നു. OSIRIS-REx, Hayabusa2 തുടങ്ങിയ ദൗത്യങ്ങള്‍ ഛിന്നഗ്രഹ സാമ്പിളുകള്‍ പോലും ഭൂമിയിലേക്ക് തിരികെ കൊണ്ടുവന്നു. ഇത് നമ്മുടെ ഗ്രഹത്തിലെ ജീവന്റെ ഉത്ഭവത്തെക്കുറിച്ചുള്ള വിവരങ്ങളും നല്‍കുന്നു.