ജില്ലാതലത്തിൽ പദയാത്രകൾ, ഡിസംബറിൽ എറണാകുളത്ത് യുവജന മഹാറാലി
വിദ്വേഷത്തിനെതിരെ, ദുര്‍ഭരണത്തിനെതിരെ എന്ന പ്രമേയവുമായി മുസ്‌ലിം യൂത്ത് ലീഗ് സംസ്ഥാന വ്യാപകമായി കാമ്പയിൻ നടത്തുമെന്ന് സംസ്ഥാന പ്രസിഡന്റ്‌ സയ്യിദ് മുനവ്വറലി ശിഹാബ് തങ്ങളും ജനറൽ സെക്രട്ടറി പി. കെ ഫിറോസും അറിയിച്ചു. വെറുപ്പും വിദ്വേഷവും വിവിധ മത വിഭാഗങ്ങൾക്കിടയിൽ വളർത്തുന്നതിനുള്ള ശ്രമങ്ങൾ രാജ്യത്ത് വർദ്ധിച്ചുകൊണ്ടിരിക്കുകയാണെന്ന് നേതാക്കൾ പറഞ്ഞു. മുസ്‌ലിങ്ങൾക്കെതിരായി വെറുപ്പ് പ്രചരിപ്പിക്കുന്നതിന് നേതൃത്വം കൊടുക്കുന്നത് രാജ്യം ഭരിക്കുന്ന സംഘ് പരിവാർ പ്രസ്ഥാനങ്ങളും അനുഭാവികളുമാണ്. പലപ്പോഴും ജനവിരുദ്ധ നയങ്ങൾ മറച്ചു പിടിക്കുന്നതിനും ഭരണ വിരുദ്ധ വികാരം വഴി തിരിച്ചു വിടുന്നതിനും വേണ്ടിയാണ് ഇത്തരം ശ്രമങ്ങൾ ഭരണകൂടം നടത്തിക്കൊണ്ടിരിക്കുന്നത്. കേരളം ഭരിക്കുന്ന ഇടത്പക്ഷ സർക്കാരും അഴിമതിയിലും കെടുകാര്യസ്ഥതയിലും മുന്നിട്ട് നിൽക്കുകയാണ് നേതാക്കൾ തുടർന്നു. ഈ പശ്ചാതലത്തിലാണ് വിദ്വേഷത്തിനെതിരെ, ദുർ ഭരണത്തിനെതിരെ എന്ന പ്രമേയം ഉയർത്തി സംസ്ഥാന വ്യാപകമായി കാമ്പയിൻ നടത്താൻ മുസ്‌ലിം യൂത്ത് ലീഗ് സംസ്ഥാന കമ്മിറ്റി തീരുമാനിച്ചതെന്ന് നേതാക്കൾ കൂട്ടിച്ചേർത്തു. കാമ്പയിനും അനുബന്ധ പരിപാടികളും വൻ വിജയമാക്കാൻ സയ്യിദ് മുനവ്വറലി ശിഹാബ് തങ്ങളും പി. കെ ഫിറോസും ആഹ്വാനം ചെയ്തു.
ശാഖ തലം മുതല്‍ സംസ്ഥാന തലം വരെ നടക്കുന്ന കാമ്പയിന്‍ വിജയിപ്പിക്കിയുന്നതിനായുള്ള കര്‍മ്മ പദ്ധതികള്‍ക്ക് മുസ്‌ലിം യൂത്ത്‌ലീഗ് സംസ്ഥാന കമ്മറ്റി രൂപം നല്‍കിയതായി നേതാക്കൾ അറിയിച്ചു. ജൂലൈ 1 മുതൽ 15വരെയായി ശാഖതലത്തില്‍ – യൂത്ത് മീറ്റ് സംഘടിപ്പിക്കും. യൂത്ത് മീറ്റ്നോട്‌ അനുബന്ധിച്ച് ശാഖ/യൂണിറ്റ് തലത്തിൽ വിപുലമായ കണ്‍വെന്‍ഷനുകള്‍ ചേര്‍ന്ന് ക്യാമ്പയിന്‍ വിശദീകരണം നടത്തും. യൂത്ത് മീറ്റിന്റെ ഭാഗമായി ശാഖ/യുണിറ്റ് തലത്തില്‍ ക്ലബ്ബ്കൾക്ക് രൂപം നൽകും. യൂത്ത് മീറ്റിനെ തുടർന്ന് ജൂലൈ 16മുതല്‍ 31 വരെയായി പഞ്ചായത്ത് തലത്തില്‍ പ്രതിനിധി സംഗമം നടത്തുന്നതാണ്. യൂണിറ്റ് ഭാരവാഹികള്‍ ആണ് പ്രതിനിധി സംഗമത്തില്‍ പങ്കെടുക്കുക. കാമ്പയിന്റെ ഭാഗമായി പഞ്ചായത്ത്, ശാഖ/യൂണിറ്റ് കമ്മിറ്റികൾ അഫിലിയേഷന്‍ നടത്തുന്നതാണ്.
കാമ്പയിന്റെ ഭാഗമായി ജൂലൈ 30ന്, യൂത്ത് ലീഗ് ദിനത്തിൽ നിയോജക മണ്ഡലതം തലത്തില്‍ സ്മൃതി വിചാരം സംഘടിപ്പിക്കുന്നതാണ്.
ഓഗസ്റ്റ് മാസത്തിൽ തമസ്‌കരിക്കപ്പെടുന്നവര്‍ ചരിത്രം പറയുന്നു എന്ന പ്രമേയത്തില്‍ ഏകദിന കോണ്‍ക്ലേവ് സംസ്ഥാന കമ്മറ്റിയുടെ നേതൃത്വത്തില്‍ സംഘടിപ്പിക്കും. സെപ്തംബര്‍ 28ന് സി.എച്ച് അനുസ്മരണ ദിനത്തില്‍ പ്രതിഭ ഫെസ്റ്റ് സംഘടിപ്പിക്കുന്നതാണ്. പ്രതിഭ ഫെസ്റ്റിന്റെ ഭാഗമായി പ്രസംഗം, പ്രബന്ധം, കവിത മത്സരങ്ങള്‍, വീഡിയോ എഡിറ്റിങ് , ഡിസൈനിങ് സംഘടിപ്പിക്കും. കാമ്പയിന്റെ പ്രചാരണാര്‍ത്ഥം പഞ്ചായത്ത് തല ടീമുകളെ പങ്കെടുപ്പിച്ച് കൊണ്ട് നിയോജക മണ്ഡലം കമ്മറ്റികളുടെ നേതൃത്വത്തില്‍ ഒക്ടോബർ മാസത്തിൽ ഫുട്‌ബോള്‍ മത്സരം സംഘടിപ്പിക്കുന്നതാണ്.
കാമ്പയിന്റെ പ്രമേയം വിശദീകരണത്തിനായി യൂത്ത്മാര്‍ച്ച് സംഘടിപ്പിക്കും. നവംബർ മാസത്തിൽ പദയാത്രയായാണ് ജില്ല തലത്തിൽ യൂത്ത് മാർച്ച്‌ സംഘടിപ്പിക്കുക. കാമ്പയിന്റെ സമാപനത്തോടനുബന്ധിച്ച് ഡിസംബര്‍ അവസാനം എറണാകുളത്ത് വെച്ച് യുവജന മഹാറാലി സംഘടിപ്പിക്കുമെന്ന് തങ്ങളും ഫിറോസും അറിയിച്ചു.
കാമ്പയിൻ സംബന്ധമായ കാര്യങ്ങൾ വിശദീകരിക്കുന്നതിനും ജില്ലതലത്തില്‍ സമയബന്ധിതമായ നടപ്പിലാക്കുന്നതിനെ കുറിച്ച് ആലോചിക്കുന്നതിനുമായുള്ള ജില്ല പ്രവർത്തക സമിതി യോഗങ്ങൾ സംസ്ഥാന നിരീക്ഷകരുടെ സാന്നിധ്യത്തിൽ നടന്നു വരുന്നു. ജില്ല പ്രവർത്തക സമിതി യോഗങ്ങളെ തുടർന്ന് ജൂണ്‍ 22നകം നിയോജക മണ്ഡലം കമ്മറ്റി യോഗങ്ങളും, ജൂണ്‍ 25നകം പഞ്ചായത്ത് കമ്മറ്റി യോഗങ്ങളും നിരീക്ഷകരുടെ സാന്നിധ്യത്തില്‍ ചേരുന്നതാണ്.