മുസ്ലിം യൂത്ത് ലീഗ് ‘ചിന്തന്‍ മിലന്‍’ ലോഗോ പാണക്കാട് സയ്യിദ് സാദിഖലി തങ്ങള്‍ പുറത്തിറക്കി. സംവാദം, ആവിഷ്‌ക്കരണം, സംവേദനം എന്ന പ്രമേയ പദങ്ങളോടെയാണ് ‘ചിന്തന്‍ മിലന്‍’ ലോഗോ രൂപകല്‍പ്പന ചെയ്തിരിക്കുന്നത്.
ഈ മാസം 13,14,15 തിയ്യതികളില്‍ മഹാരാഷ്ട്രയിലെ ലോണവാലയിലാണ് യൂത്ത് ലീഗ് ദേശീയ കമ്മിറ്റിയുടെ ‘ചിന്തന്‍ മിലന്‍’ നടക്കുന്നത്. യൂത്ത് ലീഗ് ദേശീയ ഭാരവാഹികള്‍, എക്‌സിക്യൂട്ടീവ് അംഗങ്ങള്‍, പതിനാറ് സംസ്ഥാനങ്ങളില്‍ നിന്നുള്ള പ്രസിഡന്റ്, ജനറല്‍ സെക്രട്ടറി, ട്രഷറര്‍ എന്നിവരായിരിക്കും മൂന്ന് ദിവസങ്ങളിലായി നടക്കുന്ന യൂത്ത് ലീഗ് ചിന്തന്‍ മിലന്‍ പ്രതിനിധികള്‍. ഡല്‍ഹിയില്‍ നടന്ന ലോഗോ പ്രകാശന ചടങ്ങില്‍ മുസ്ലിം ലീഗ് ദേശീയ പ്രസിഡന്റ് പ്രൊഫ. ഖാദര്‍ മൊയ്ദീന്‍, ജനറല്‍ സെക്രട്ടറി പികെ കുഞ്ഞാലിക്കുട്ടി, ഓര്‍ഗനൈസിങ് സെക്രട്ടറി ഇ ടി മുഹമ്മദ് ബഷീര്‍ എംപി , ട്രഷറര്‍ പിവി അബ്ദുല്‍ വഹാബ് എംപി, സീനിയര്‍ വൈസ് പ്രസിഡന്റ് എംപി അബ്ദുസ്സമദ് സമദാനി എംപി, അസിസ്റ്റന്റ് സെക്രട്ടറി സികെ സുബൈര്‍, കെപിഎ മജീദ് എം.എല്‍.എ, യൂത്ത് ലീഗ് ദേശീയ പ്രസിഡന്റ് ആസിഫ് അന്‍സാരി, ജനറല്‍ സെക്രട്ടറി അഡ്വ.ഫൈസല്‍ ബാബു, ഓര്‍ഗനൈസിങ് സെക്രട്ടറി ടിപി അഷ്‌റഫലി, എംഎസ്എഫ് ദേശീയ പ്രസിഡന്റ് അഹമ്മദ് സാജു തുടങ്ങിയവര്‍ സംബന്ധിച്ചു.