കോഴിക്കോട്: മ്യാന്‍മര്‍ ഭരണകൂടം നടത്തുന്ന വംശഹത്യയിലും ഇന്ത്യന്‍ സര്‍ക്കാര്‍ റോഹിന്‍ഗ്യന്‍ അഭയാര്‍ഥികളോട് സ്വീകരിക്കുന്ന നിലപാടിലും പ്രതിഷേധിച്ച് കോഴിക്കോട്ട് ഉജ്ജ്വല എസ്.വൈ.എസ് റാലി. ലോക മനസാക്ഷിയെ ഞെട്ടിക്കുന്ന രീതിയില്‍ മ്യാന്മറില്‍ നടക്കുന്ന ഭരണകൂട ഭീകരതക്കെതിരെ ശക്തമായ താക്കീതായി ആയിരങ്ങളാണ് റാലിയില്‍ അണിനിരന്നത്. സംസ്ഥാന കമ്മിറ്റിയുടെ അഭിമുഖ്യത്തില്‍ നടന്ന റാലി വൈകീട്ട് റെയില്‍വേസ്‌റ്റേഷന്‍ ലിങ്ക് റോഡില്‍ നിന്നും ആരംഭിച്ചു അരയിടത്തുപാലത്തു സമാപിച്ചു.
സമസ്ത പ്രസിഡണ്ട് സയ്യിദ് ജിഫ്രി മുത്തുക്കോയ തങ്ങള്‍ സമ്മേളനം ഉദ്ഘാടനം ചെയ്തു. മ്യാന്മറിലെ വംശഹത്യ പ്രശ്‌നത്തില്‍ മുസ്്‌ലിംകള്‍ ഇടപെടുന്നത് വിശ്വാസികള്‍ എന്ന നിലയില്‍ മാത്രമല്ലെന്നും അവിടെ നടക്കുന്ന മനുഷ്യത്വവിരുദ്ധ നടപടിക്കെതിരെയാണെന്നും അദ്ദേഹം പറഞ്ഞു. ജീവനുള്ള ഒന്നിനേയും നോവിക്കരുതെന്നു പറയുന്ന മതമാണ് ഇസ്്‌ലാം. ഭാരതത്തിന്റെ പാരമ്പര്യത്തിനു വിരുദ്ധമായാണ് റോഹിന്‍ഗ്യന്‍ അഭയാര്‍ഥികളുടെ വിഷയത്തില്‍ കേന്ദ്രം സ്വീകരിക്കുന്ന നിലപാട്. അവര്‍ക്കു ജീവിക്കാന്‍ അനകൂലമായ സാഹചര്യം ഇന്ത്യയില്‍ സൃഷ്ടിക്കുമെന്ന പ്രതീക്ഷയാണുള്ളതെന്നും അദ്ദേഹം കൂട്ടിച്ചേര്‍ത്തു.
എസ്.വൈ.എസ് സംസ്ഥാന ജനറല്‍ സെക്രട്ടറി സയ്യിദ് മുഹമ്മദ് കോയ തങ്ങള്‍ ജമലുല്ലൈലി അധ്യക്ഷത വഹിച്ചു. മുസ്‌ലിംലീഗ് ദേശീയ ജനറല്‍ സെക്രട്ടറി പി.കെ കുഞ്ഞാലിക്കുട്ടി എം.പിയും സമസ്ത ജനറല്‍ സെക്രട്ടറി കെ. ആലിക്കുട്ടി മുസ്്‌ലിയാരും മുഖ്യപ്രഭാഷണങ്ങള്‍ നടത്തി. അബ്ദുല്‍ ഹമീദ് ഫൈസി അമ്പലക്കടവ്, റഹ്മത്തുല്ല ഖാസിമി മൂത്തേടം പ്രഭാഷണം നടത്തി. നാസര്‍ ഫൈസി കൂടത്തായി സ്വാഗതവും കെ.മോയിന്‍കുട്ടി മാസ്റ്റര്‍ നന്ദിയും പറഞ്ഞു.
റാലിക്ക് കെ ഉമര്‍ ഫൈസി മുക്കം, പിണങ്ങോട് അബൂബക്കര്‍, മൊയ്തീന്‍ ഫൈസി പുത്തനഴി, അഹമ്മദ് തെര്‍ളായി, ആര്‍.വി കുട്ടിഹസന്‍ ദാരിമി, മലയമ്മ അബൂബക്കര്‍ ബാഖവി, കെ.കെ.എസ് തങ്ങള്‍ വെട്ടിച്ചിറ, സത്താര്‍ പന്തലൂര്‍, സയ്യിദ് മുബഷിര്‍ തങ്ങള്‍ ജമലുല്ലൈലി തുടങ്ങിയവര്‍ നേതൃത്വം നല്‍കി.