കോഴിക്കോട് : വിദ്വേഷത്തിനെതിരെ ദുർഭരണത്തിനെതിരെ പ്രമേയവുമായി മുസ്‌ലിം യൂത്ത് ലീഗ് സംസ്ഥാന കമ്മറ്റി 2023 ജൂലൈ 1 മുതൽ നടത്തിവരുന്ന ക്യാമ്പയിനിൻ്റെ സമാപനമായി സംഘടിപ്പിക്കുന്ന മഹാറാലിയുടെ ഒരുക്കങ്ങൾ അവസാന ഘട്ടത്തിൽ. ഞായറാഴ്ച്ച വൈകിട്ട് 3 മണിക്ക് സ്വപ്നനഗരിയിൽ നിന്നും പ്രകടനം ആരംഭിക്കും. വൈകിട്ട് അഞ്ച് മണിക്ക് കടപ്പുറത്ത് റാലി സമാപിക്കും. തുടർന്ന് നടക്കുന്ന മഹാസമ്മേളനം മുസ്‌ലിം ലീഗ് സംസ്ഥാന പ്രസിഡണ്ട് പാണക്കാട് സയ്യിദ് സാദിഖലി ശിഹാബ് തങ്ങൾ ഉദ്ഘാടനം ചെയ്യും. തെലുങ്കാന സംസ്ഥാന പഞ്ചായത്തി രാജ് & ഗ്രാമവികസന വകുപ്പ് മന്തി ദൻസാരി അനസൂയ സീതക്ക മുഖ്യാതിഥിയായി പങ്കെടുക്കും. കേരള പ്രതിപക്ഷ നേതാവ് വി ഡി സതീശൻ, മുസ്‌ലിം ലീഗ് ദേശീയ-സംസ്ഥാന നേതാക്കൻമാർ എന്നിവർ മഹാറാലിയെ അഭിസംബോധന ചെയ്യും.
മഹാറാലിയുടെ പ്രചരണമായി ശാഖകളിൽ വിളംബര ജാഥകൾ നടന്നു. ശാഖകളിൽ നിന്നും പ്രവർത്തകരെ കൃത്യസമയത്ത് പ്രകടനത്തിലേക്കെത്തിക്കാൻ വാഹനങ്ങൾ യൂണിറ്റ് കമ്മറ്റികൾ തയ്യാറാക്കിയിട്ടുണ്ട്. പല സ്ഥലങ്ങളിലും സമ്മേളന സന്ദേശം ഉയർത്തിപ്പിടിച്ച് ഞായറഴ്ച്ച പ്രഭാതഭേരിയും സംഘടിപ്പിക്കുന്നുണ്ട്.
നാളെ (ശനിയാഴ്ച്ച) രാവിലെ 6.30ന് കോഴിക്കോട് സൗത്ത് നിയോജക മണ്ഡലത്തിൻ്റെ ആഭിമുഖ്യത്തിൽ സൗത്ത് ബീച്ച് പരിസരത്ത് നിന്നാരംഭിച്ച് സമാപന വേദിയായ കടപ്പുറത്തെ ഓപ്പൺ സ്റ്റേജ് വരെ യൂത്ത് വാക്ക് നടത്തും. പരിപാടിയിൽ യൂത്ത് ലീഗ് ജില്ലാ -സംസ്ഥാന നേതാക്കൾ പങ്കെടുക്കും.