കോഴിക്കോട് :. പ്രാദേശിക പാർട്ടി ഓഫീസുകളെ പൊതുജന സേവന കേന്ദ്രങ്ങളാക്കി മാറ്റുന്ന മുസ്‌ലിം യൂത്ത് ലീഗ് ജനസഹായി സെന്ററുകളുടെ രണ്ടാം ഘട്ടത്തിൽ ആരംഭിക്കുന്ന ഓഫീസുകളുടെ സംസ്ഥാന തല ഉദ്ഘാടനം നാളെ (ജൂലായ് 4, ചൊവ്വാഴ്ച) പാണക്കാട് വെച്ച് നടക്കും. രാവിലെ 10.30ന് പാണക്കാട് വാർഡ് മുസ്‌ലിം ലീഗ് ഓഫീസായ പി.എം.എസ്‌.എ സൗധത്തിൽ തുടങ്ങുന്ന ജനസഹായി കേന്ദ്രത്തിന്റെ ഉദ്ഘാടനം യൂത്ത് ലീഗ് സംസ്ഥാന പ്രസിഡന്റ്‌ പാണക്കാട് സയ്യിദ് മുനവ്വറലി ശിഹാബ് തങ്ങൾ നിർവഹിക്കും. മുസ്‌ലിം ലീഗ് , യൂത്ത് ലീഗ് നേതാക്കൾ സംബന്ധിക്കും. രണ്ടാം ഘട്ടത്തിൽ തുടങ്ങുന്ന സംസ്ഥാനത്തെ മറ്റു കേന്ദ്രങ്ങൾ ജൂലായ് 7ന് വെള്ളിയാഴ്ച്ച അതാത് പ്രദേശവാസികൾക്കായി തുറന്ന് കൊടുക്കുമെന്ന് സംസ്ഥാന ജനറൽ സെക്രട്ടറി പി. കെ ഫിറോസ് അറിയിച്ചു.