കോഴിക്കോട്: ഏഴരപ്പതിറ്റാണ്ടിന്റെ അഭിമാനം എന്ന പ്രമേയത്തില്‍ നവംബര്‍ ഒന്ന് മുതല്‍ 30 വരെ ഒരു മാസക്കാലം നീണ്ടുനിന്ന മുസ്‌ലിംലീഗ് അംഗത്വ കാമ്പയിന്റെ ഭാഗമായ നടപടിക്രമങ്ങള്‍ പൂര്‍ത്തിയാക്കാന്‍ ഇനി മൂന്ന് ദിവസം മാത്രം. വിവരങ്ങള്‍ അപ്‌ലോഡ് ചെയ്യാനും ഫീസടയ്ക്കാനും ഡിസംബര്‍ 15 വരെയാണ് സമയം അനുവദിച്ചിരുന്നത്. 15ന് മുമ്പ് മുഴുവന്‍ ഫീസും അടച്ച് നടപടിക്രമങ്ങള്‍ പൂര്‍ത്തിയാക്കിയ കമ്മിറ്റികള്‍ക്ക് മാത്രമേ വാര്‍ഡ് സമ്മേളനം ഉള്‍പ്പെടെ അടുത്ത ഘട്ടത്തിലേക്ക് കടക്കാന്‍ കഴിയൂ.
വിവരങ്ങള്‍ അപ്‌ലോഡ് ചെയ്ത ശേഷം ഫീസടയ്ക്കാത്ത അംഗത്വ അപേക്ഷകള്‍ പരിഗണിക്കില്ല. ഫീസടച്ച അംഗങ്ങളുടെ എണ്ണം അനുസരിച്ചുള്ള പ്രാതിനിധ്യമാണ് അതത് വാര്‍ഡുകള്‍ക്ക് പഞ്ചായത്ത് കൗണ്‍സിലുകളില്‍ ഉണ്ടാവുക. നടപടികള്‍ പൂര്‍ത്തിയാക്കാത്ത എല്ലാ വാര്‍ഡ് കമ്മിറ്റികളും ഇന്നും നാളെയുമായി മുഴുവന്‍ ഫീസും അടച്ച് അംഗത്വവും കൗണ്‍സില്‍ പ്രാതിനിധ്യവും ഉറപ്പ്‌വരുത്തണമെന്ന് സംസ്ഥാന ജനറല്‍ സെക്രട്ടറി പി.എം.എ സലാം അറിയിച്ചു. 15ന് ശേഷം ഒരു കാരണവശാലും ഫീസടയ്ക്കാനോ അംഗത്വം പുതുക്കാനോ അവസരം ഉണ്ടാകില്ല. ഒന്നിച്ച് ഫീസ് അടയ്ക്കുമ്പോള്‍ പരമാവധി 800 അംഗങ്ങളുടെ ഫീസടയ്ക്കാനുള്ള സാങ്കേതിക സൗകര്യമാണുള്ളത്. കൂടുതല്‍ അംഗങ്ങളെ ചേര്‍ത്തിയവര്‍ രണ്ടോ മൂന്നോ ഗഡുക്കളായി ഫീസ് അടയ്ക്കാവുന്നതാണ്. ബാങ്ക് വഴി പണം അടക്കുന്നവര്‍ക്കും യു.പി.ഐ പേയ്‌മെന്റ് നടത്തുന്നവര്‍ക്കും ഈ നിബന്ധന ബാധകമാണ്. ഡിസംബര്‍ ഒന്ന് മുതല്‍ വാര്‍ഡ് സമ്മേളനങ്ങളും കമ്മിറ്റി രൂപീകരണവും നടന്നുവരികയാണ്. ഡിസംബര്‍ 31നകം വാര്‍ഡ് കമ്മിറ്റി രൂപീകരണം പൂര്‍ത്തിയാകും. ജനുവരി ഒന്ന് മുതല്‍ പഞ്ചായത്ത് കമ്മിറ്റികള്‍ നിലവില്‍ വരും.