”മുന്നാ ഭായ് എ.ഐ.ഐ.എം.എസ്”; ഡല്‍ഹി എയിംസില്‍ വ്യാജ ഡോക്ടര്‍ വിലസിയത് അഞ്ചു മാസം

ന്യുഡല്‍ഹി: ഡല്‍ഹിയിലെ ആള്‍ ഇന്ത്യാ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സില്‍(എയിംസ്) അഞ്ചു മാസത്തോളം ഡോക്ടറായി ആള്‍മാറാട്ടം നടത്തിയ യുവാവ് അറസ്റ്റില്‍. ബിഹാര്‍ സ്വദേശി അദ്നാന്‍ ഖുറം (19) ആണ് അറസ്റ്റിലായത്. മെഡിക്കല്‍ ബിരുദങ്ങളൊന്നുമില്ലാത്ത ഇയാള്‍ക്ക് വൈദ്യശാസ്ത്രത്തെ കുറിച്ചും ആസ്പത്രിയിലെ ഡോക്ടര്‍മാരെ കുറിച്ചുമുള്ള അറിവ് മനസ്സിലാക്കിയ പൊലീസുപോലും ഞെട്ടി. ഡോക്ടര്‍മാരുടെ സമരങ്ങള്‍ മുതല്‍ യൂണിയന്‍ കാര്യങ്ങളിലും പൊതു വിഷയങ്ങളിലും സജീവമായിരുന്നു ഖുറം. കൊളേജിലും ഡോക്ടര്‍മാര്‍ക്കിടയില്‍ അടുത്ത ബന്ധം പുലര്‍ത്തിയിരുന്ന ഇയാള്‍ വിവിധ വിഷയങ്ങളിലായി എയിംസ് സന്ദര്‍ശിച്ച വി.വി.ഐപ്പികളുമായി ബന്ധമുണ്ടാക്കാന്‍ ശ്രമിച്ചിരുന്നു.
കഴിഞ്ഞ അഞ്ച് മാസമായി ക്യാമ്പസില്‍ വിലസിയ ഖുറമിനെ ശനിയാഴ്ചയാണ് പൊലീസ് അറസ്റ്റ് ചെയ്തത്.

രാഹുല്‍ ഗാന്ധിയുമായി ബന്ധമുണ്ടെന്ന് കാണിക്കാനായി പുറത്തുവിട്ട ചിത്രം, രാഹുല്‍ ഗാന്ധിയെ ബാരിക്കേടിന് പുറത്തുനിന്നും ഖുറം ഹസ്തദാനം ചെയ്യുന്നു

ഡോക്ടര്‍മാര്‍ക്ക് മാത്രമായി നല്‍കുന്ന ഡയറിയും ഇയാളുടെ പക്കലുണ്ടായിരുന്നു. എന്നാല്‍ എന്തിനാണ് ഖുറാം ഡോക്ടറായി ആള്‍മാറാട്ടം നടത്തിയതെന്ന് പൊലീസിന് ഇതുവരെയും വ്യക്തമായിട്ടില്ല. ഇയാള്‍ പല കാരണങ്ങളാണ് പറഞ്ഞുകൊണ്ടിരിക്കുന്നത്. ഒരു അസുഖ ബാധിതനായി കിടക്കുന്ന ബന്ധുവിനെ ചികിത്സിക്കാനാണെന്നാണ് ആദ്യം പറഞ്ഞതെങ്കില്‍ ഭാവിയില്‍ ഡോക്ടറാകാനുള്ള തയാറെടുപ്പാണിതെന്ന് പിന്നീട് പറഞ്ഞു. പെരുമാറ്റത്തില്‍ സംശയം തോന്നിയതിനെ തുടര്‍ന്ന് പൊലീസ് ഇയാളെ നിരീക്ഷിച്ച് വരികയായിരുന്നു. ഡോക്ടര്‍മാര്‍ക്കിടയില്‍ അടുത്ത ബന്ധം പുലര്‍ത്തിയിരുന്ന ഇയാള്‍ പലര്‍ക്കുമിടയില്‍ പലതരത്തിലാണ് സ്വയം പരിചയപ്പെടുത്തിയിരുന്നത്. ചിലര്‍ക്കിടയില്‍ ജൂനിയര്‍ റെസിഡന്റ് ഡോക്ടറെന്നും ജൂനിയര്‍ ഡോക്ടമാര്‍ക്കിടയില്‍ മെഡിക്കല്‍ സ്റ്റുഡന്റെന്നും മാറ്റി പറഞ്ഞു. എംയിസില്‍ 2000 ഓളം റെസിഡന്റ് ഡോക്ടര്‍മാരാണുള്ളത്. ഓരോരുത്തര്‍ക്കും പരസ്പരം അറിയില്ല എന്നതാണ് ഖുറം മുതലെടുത്തത്. ശനിയാഴ്ച ഡോക്ടേഴ്‌സ് മാരത്തോണില്‍ ഖുറം പങ്കെടുത്തിരുന്നു. സംശയം തോന്നിയ ചിലര്‍ തിരിച്ചറിയല്‍ രേഖ ആവശ്യപ്പെട്ടു. ഇതോടെയാണ് കള്ളിപൊളിഞ്ഞത്.