തിരുവനന്തപുരം: വയനാട് മുണ്ടൈക്കെ, ചൂരല്‍മല പുനരധിവാസത്തിനായി രണ്ട് ടൗണ്‍ഷിപ്പുകള്‍ നിര്‍മിക്കുമെന്ന് മുഖ്യമന്ത്രി പിണറായി വിജയന്‍ വാര്‍ത്താസമ്മേള നത്തില്‍ പറഞ്ഞു. ഇവയുടെ നിര്‍മാണച്ചുമതല ഊരാളുങ്കല്‍ സൊസൈറ്റിക്കാണെന്നും കിഫ്‌കോണിന് ആണ് നിര്‍മാണ മേല്‍നോട്ടമെന്നും അദ്ദേഹം കൂട്ടിച്ചേര്‍ത്തു ടൌണ്‍ഷിപ്പ് മാതൃക കാണിച്ചുകൊണ്ടായിരുന്നു വാര്‍ത്താസമ്മേളനം. മുഖ്യമന്ത്രിക്കൊപ്പം ചീഫ് സെക്രട്ടറിയും എത്തിയിരുന്നു.
ഉപജീവന ചുറ്റുപാട് അടക്കമാണ് പുനരധി വാസമെന്നും മുഖ്യമന്ത്രി പറഞ്ഞു. ജനുവരി 25നകം ഗുണഭോക്താക്കളുടെ ലിസ്റ്റ് പുറത്തിറക്കും. രണ്ട് എസ്‌റ്റേറ്റുകളിലായി മോഡല്‍ ടൗണ്‍ഷിപ്പുകള്‍ നിര്‍മിക്കും. കല്‍പ്പറ്റയിലെ എസ്‌റ്റേറ്റില്‍ അഞ്ച് സെന്റിലും നെടുന്പാലയിലെ ടൗണ്‍ഷിപ്പില്‍ പത്ത് സെന്റിലും വീടുകള്‍ നിര്‍മിക്കും. ഭൂമിയുടെ വില അടിസ്ഥാനമാക്കിയാണ് അഞ്ച്, പത്ത് സെന്റുകള്‍ തീരുമാനിച്ചത്. ഭാവിയില്‍ മുകളിലേക്ക് നില കെട്ടാവുന്ന വിധത്തിലാകും വീടുകള്‍ നിര്‍മിക്കുന്നത്. റോഡ് ഉള്‍പ്പെടെയുള്ള അടിസ്ഥാന സൗകര്യങ്ങള്‍ നടപ്പാക്കും. അങ്കണവാടി, സ്‌കൂള്‍, ആശുപത്രി, മാര്‍ക്കറ്റ്, പാര്‍ക്കിംഗ്, കളിസ്ഥലം എന്നിവയും ടൗണ്‍ഷിപ്പുകളില്‍ നിര്‍മിക്കുമെന്നും മുഖ്യമന്ത്രി വ്യക്തമാക്കി.