കൊടുവള്ളി വെണ്ണക്കാട് പെട്രോള്‍ പമ്പിലെ മോഷണത്തില്‍ വന്‍ ട്വിസ്റ്റ്. ജീവനക്കാരിയുടെ ബാഗില്‍നിന്ന് മോഷ്ടിച്ചത് മുക്കുപണ്ടമാണെന്ന് കണ്ടെത്തി. പമ്പിലെ മുറിയില്‍ സൂക്ഷിച്ച ബാഗില്‍ നിന്ന് ഒന്നേകാല്‍ പവന്റെ മാലയും 3,000 രൂപയും കവര്‍ന്നുവെന്നായിരുന്നു പരാതി.
അതേസമയം, ബാഗിലുണ്ടായിരുന്നത് മുക്കുപണ്ടമാണെന്ന കാര്യം യുവതിക്ക് അറിയില്ലായിരുന്നുവെന്നു പറയുന്നു. ബാഗില്‍ ഒരു സ്വര്‍ണമാലയും മുക്കുപണ്ടവും ഉണ്ടായിരുന്നു. ഇതില്‍ സ്വര്‍ണമാല അമ്മ എടുത്തിരുന്നു. ഇക്കാര്യം യുവതി അറിഞ്ഞില്ല. ഇതോടെയാണ് മോഷ്ടിക്കപ്പെട്ടത് സ്വര്‍ണമാലയാണെന്ന് തെറ്റിദ്ധരിച്ചത്.
മോഷണവുമായി ബന്ധപ്പെട്ട് ഇന്നലെ രണ്ട് വിദ്യാര്‍ത്ഥികളെ പൊലീസ് പിടികൂടിയിരുന്നു. ഇന്നലെ ഉച്ചയ്ക്കാണ് കേസിന് ആസ്പദമായ സംഭവമുണ്ടായത്. വൈകിട്ടു ജോലി കഴിഞ്ഞ് വീട്ടില്‍ പോകാന്‍ ബാഗ് എടുത്തപ്പോഴാണ് യുവതി മോഷണ വിവരം അറിയുന്നത്. തുടര്‍ന്ന് സിസിടിവി ദൃശ്യങ്ങള്‍ പരിശോധിച്ചാണ് പ്രതികളെ കണ്ടെത്തിയത്. മറ്റൊരാള്‍ക്കൊപ്പം ബൈക്കില്‍ പെട്രോള്‍ പമ്പില്‍ എത്തിയ പ്രതി, പമ്പിലെ ശുചിമുറിക്കു സമീപത്തു കൂടിയാണു മുറിയില്‍ കടന്നത്.