മുംബൈ: ഏഷ്യയിലെ ഏറ്റവും ധനികനായ മുകേഷ് അംബാനി പ്രാദേശിക ഓണ്‍ലൈന്‍ റീട്ടെയിലര്‍മാരെ സ്വന്തമാക്കാന്‍ ഒരുങ്ങുന്നു.തന്റെ ഇ-കൊമേഴ്‌സ് പ്ലാറ്റ്‌ഫോം വിപുലീകരിച്ച് ആമസോണ്‍ പോലുള്ള ഇന്റര്‍നാഷണല്‍ ഓണ്‍ലൈന്‍ കമ്പനികളോട് മത്സരിക്കാനാണ് അദ്ദേഹം ശ്രമം എന്നാണ് പുറത്ത് വരുന്ന റിപ്പോര്‍ട്ടുകള്‍.
നിലവില്‍ അര്‍ബന്‍ ലാഡര്‍, സിവാമെ, നെറ്റ്‌മെഡ്‌സ് എന്നിവയുടെ ഓഹരികള്‍ വാങ്ങുന്നതിനുള്ള പ്രാരംഭഘട്ടം റിലയന്‍സ് ഇന്‍ഡസ്ട്രീസ് ലിമിറ്റഡ് ആരംഭിച്ചിട്ടുണ്ടെന്നാണ് പുറത്ത് വരുന്ന വിവരം. ആമസോണ്‍ പോലുള്ള ആഗോള ഭീമന്മാര്‍ക്കും നിരവധിയുള്ള പ്രാദേശിക കമ്പനികള്‍ക്കും ഇതൊരു കനത്ത വെല്ലുവിളിയാകും. ഫെയ്‌സ്ബുക്കും ഗൂഗിളും ആഴ്ച്ചകള്‍ക്ക് മുമ്പ് റിലയന്‍സിന്റെ ഡിജിറ്റല്‍ പ്ലാറ്റ്‌ഫോമായ ജിയോയില്‍ നിക്ഷേപം നടത്തിയിരുന്നു. ഇതിന് പിന്നാലെയാണ് റിലയന്‍സ് ലിമിറ്റഡ് ഓണ്‍ലൈന്‍ രംഗത്തേക്ക് കൂടുതല്‍ നിക്ഷേപങ്ങള്‍ക്കൊരുങ്ങുന്നത്.