![](data:image/svg+xml;charset=utf-8,<svg height="555px" width="740px" xmlns="http://www.w3.org/2000/svg" version="1.1"/>)
ന്യൂഡല്‍ഹി: രാഷ്ട്രപതി ഭവനിലെ ഉദ്യാനമായ മുഗള്‍ ഗാര്‍ഡന്റെ പേരും മാറ്റി. അമൃത് ഉദ്യാന്‍ എന്നാണ് പുതുതായി നാമകരണം ചെയ്തത്. സ്വാതന്ത്ര്യത്തിന്റെ 75ാം വാര്‍ഷികാഘോഷത്തിന്റെ ഭാഗമായാണ് പേര് മാറ്റം. ‘ആസാദി കാ അമൃത് മഹോത്സവ്’ എന്ന പേരുമായി ചേരുന്നതിനാലാണ് ‘അമൃത് ഉദ്യാന്‍’ എന്ന പേരിട്ടിരിക്കുന്നത്.
സാമ്രാജ്യത്വ കാലഘട്ടത്തിന്റെയും സ്വാതന്ത്ര്യ പൂര്‍വകാല അധിനിവേശത്തിന്റെയും സ്വാധീനം പൂര്‍ണമായും ഒഴിവാക്കുന്നതിന്റെ ഭാഗമായാണ് രാഷ്ട്രപതി ഭവന്‍ മുഗള്‍ ഗാര്‍ഡന്റെ പേരുമാറ്റിയത്.
ബ്രിട്ടിഷ് ഭരണകാലത്ത് രാഷ്ട്രപതി ഭവന്‍, നോര്‍ത്ത്, സൗത്ത് ബ്ലോക്കുകള്‍, പാര്‍ലമെന്റ് എന്നിവ ഉള്‍പ്പെടുന്ന ന്യൂഡല്‍ഹിയുടെ ഭരണസിരാകേന്ദ്രങ്ങളുടെ നിര്‍മാണ വേളയിലാണ് ഈ ഉദ്യാനം പണികഴിപ്പിച്ചത്. ഷാജഹാന്‍ ചക്രവര്‍ത്തി നിര്‍മിച്ച കശ്മീര്‍ ഉദ്യാനത്തിനു സമാനമായ രീതിയില്‍ നിര്‍മിച്ചതിനാലാണ് മുഗള്‍ ഗാര്‍ഡന്‍ എന്ന പേരുനല്‍കിയത്. ജനുവരി 31 മുതല്‍ മാര്‍ച്ച് 26 വരെ സാധാരണക്കാര്‍ക്കായി അമൃത് ഉദ്യാന്‍ തുറന്നുകൊടുക്കും.
