ന്യൂഡല്‍ഹി: ഇന്ത്യ ഇതുവരെ വിക്ഷേപിച്ചതില്‍ ഏറ്റവും ഭാരമേറിയ വാര്‍ത്താ വിതരണ ഉപഗ്രഹം ജിസാറ്റ് 11 വിക്ഷേപണം വിജയകരം. ഫ്രാന്‍സിന്റെ ശക്തി കൂടിയ വിക്ഷേപണ വാഹനമായ ഏരിയന്‍ 5 ആണ് ജിസാറ്റ് 11നെ ഭ്രമണപഥത്തിലെത്തിച്ചത്. ‘വലിയ പക്ഷി’ എന്ന പേരില്‍ ആണ് ഈ ഉപഗ്രഹം അറിയപ്പെടുന്നത്.
ഫ്രഞ്ച് ഗയാനയിലെ കൗറു വിക്ഷേപണ നിലയത്തില്‍ നിന്ന് ഇന്ത്യന്‍ സമയം പുലര്‍ച്ചെ മൂന്നരയോടെ ആയിരുന്നു വിക്ഷേപണം. ഗ്രാമീണ മേഖലയില്‍ ഇന്റര്‍നെറ്റിന്റെ വേഗത കൂട്ടുകയാണ് ജിസാറ്റ് 11 ലക്ഷ്യം. രാജ്യത്ത് 16 ജിബിപിഎസ് വേഗത്തിലുള്ള ഇന്റര്‍നെറ്റ് ലഭ്യമാക്കുകയാണ് ഈ ഉപഗ്രഹത്തിന്റെ സവിശേഷതകളെന്ന് ഐഎസ്ആര്‍ഒ വക്താക്കള്‍ അറിയിച്ചു. ഉപഗ്രഹാധിഷ്ടിത ഇന്റര്‍നെറ്റ് സേവനം മെച്ചപ്പെടുത്താനാണ് ഇതിലൂടെ ശ്രമിക്കുന്നത്. ആശയവിനിമയ രംഗത്ത് ഇന്ത്യ ഇപ്പോഴുള്ളതിനേക്കാള്‍ കൂടുതല്‍ ശക്തരാകലാണ് ജിസാറ്റ് 11 ന്റെ ലക്ഷ്യം. 5845 കിലോഗ്രാമാണ് ജിസാറ്റ് 11ന്റെ ഭാരം. 15 വര്‍ഷമാണ് ഉപഗ്രഹത്തിന്റെ കാലാവധി. 1200 കോടി രൂപയാണ് ചെലവ്. റേഡിയോ സിഗ്‌നല്‍ സ്വീകരിക്കുകയും പുറത്തുവിടുകയും ചെയ്യുന്ന 40 ട്രാന്‍സ്‌പോണ്ടറുകള്‍ ഉപഗ്രഹത്തിലുണ്ട്.