കൊല്ലം: കൊല്ലം ചിതറയില്‍ യുവതിയെ മരത്തില്‍ കെട്ടിയിട്ട് സദാചാര ഗുണ്ടകളുടെ ആക്രമണം. രണ്ട് മണിക്കൂറോളം മരത്തില്‍ കെട്ടിയിട്ട് മര്‍ദ്ദിക്കുകയായിരുന്നുവെന്ന് യുവതി പരാതി നല്‍കി. വീട്ടില്‍ അതിക്രമിച്ച് കയറിയായിരുന്നു അക്രമം.
യുവതിയെക്കൂടാതെ വീട്ടിലുണ്ടായിരുന്ന മകന്റെ സുഹൃത്തിനേയും സദാചാര ഗുണ്ടകള്‍ മരത്തില്‍ കെട്ടിയിടുകയും മര്‍ദ്ദിക്കുകയും ചെയ്തുവെന്നും യുവതി പറയുന്നു. ആക്രമണത്തിന് ശേഷം യുവതിയുടെ ചിത്രങ്ങളെടുത്ത് പ്രചരിപ്പിക്കുന്നതായി യുവതി പറഞ്ഞു. എന്നാല്‍ സംഭവത്തെക്കുറിച്ച് പോലീസില്‍ പരാതി പറഞ്ഞിട്ടും പോലീസ് കേസെടുത്തില്ലെന്നും അവര്‍ ആരോപിക്കുന്നു.
നേരത്തേയും കൊല്ലത്ത് സദാചാര ആക്രമണങ്ങള്‍ ഉണ്ടായിട്ടുണ്ട്. അഴീക്കലില്‍ സദാചാര ഗുണ്ടകള്‍ ആക്രമിച്ച യുവാവ് ആത്മഹത്യ ചെയ്തിരുന്നു. കൂട്ടുകാരിക്കൊപ്പം പിടിച്ചുനിര്‍ത്തിയ യുവാവിന്റെ ചിത്രം തെറ്റായ രീതിയില്‍ പ്രചരിപ്പിച്ചതില്‍ മനംനൊന്തായിരുന്നു ആത്മഹത്യ.