ഇന്ത്യന്‍ ക്രിക്കറ്റ് ടീമിന്റെ ബൗളിംഗ് പരിശീലകനായി മോണി മോര്‍ക്കല്‍ എത്തുമെന്ന് റിപ്പോര്‍ട്ട്. സെപ്റ്റംബര്‍ ഒന്ന് മുതല്‍ മോര്‍ക്കല്‍ ഔദ്യോഗികമായി ഇന്ത്യന്‍ ടീമിന്റെ ബൗളിംഗ് പരിശീലകനായി ചുമതലയേല്‍ക്കുമെന്നാണ് റിപ്പോര്‍ട്ടില്‍ പറയുന്നത്. ബിസിസിഐ സെക്രട്ടറി ജയ് ഷാ ഇക്കാര്യം സ്ഥിരീകരിച്ചതായി ദേശീയ മാധ്യമങ്ങള്‍ പറയുന്നു.
മുമ്പ് അന്താരാഷ്ട്ര തലത്തില്‍ പാകിസ്താന്‍ ടീമിന്റെ ബൗളിംഗ് പരിശീലകനായി മോര്‍ക്കല്‍ പ്രവര്‍ത്തിച്ചിട്ടുണ്ട്. ഇന്ത്യന്‍ പ്രീമിയര്‍ ലീഗില്‍ ലഖ്‌നൗ സൂപ്പര്‍ ജയന്റ്‌സിന്റെയും ബൗളിംഗ് പരിശീലകനായിരുന്നു മോര്‍ക്കല്‍. ഗംഭീര്‍ ഇന്ത്യന്‍ ക്രിക്കറ്റ് ടീം മുഖ്യപരിശീലകനായി ചുമതലയേല്‍ക്കുമ്പോള്‍ ബൗളിംഗ് പരിശീലകനായി എത്തുക മോര്‍ക്കലെന്ന് റിപ്പോര്‍ട്ടുകളുണ്ടായിരുന്നു.
ദക്ഷിണാഫ്രിക്കയ്ക്കായി 86 ടെസ്റ്റുകളിലും 117 ഏകദിനങ്ങളിലും 44 ട്വന്റി 20കളിലും മോര്‍ക്കല്‍ കളിച്ചിട്ടുണ്ട്. ടെസ്റ്റില്‍ 309 വിക്കറ്റുകളും ഏകദിനത്തില്‍ 188 വിക്കറ്റുകളും ട്വന്റി 20യില്‍ 47 വിക്കറ്റുകളും താരം സ്വന്തമാക്കി. 2006 മുതല്‍ 2018 വരെയാണ് മോര്‍ക്കല്‍ ദക്ഷിണാഫ്രിക്കന്‍ ടീമില്‍ കളിച്ചത്.